Yvonne Lee-Perez cu relato:
*Lo yama 3500 number cu mester abarca henter Aruba
ORANJESTAD (AAN) – Yvonne Lee-Perez, funcionario di Departamento di Labor y Investigacion, a elabora den conferencia di prensa, tocante e encuesta laboral organiza pa DAO, y cu pa departamento di labor por yuda tin un miho bista henter e aña.
Lee-Perez a indica cu e tabata tey pa Directie Arbeid & Onderzoek. El a splica cu e “labor force survey” ta un onderzoek cu nan ta haciendo tur aña, desde aña 2000. Hopi biaha e ta cay entre September, October y November, y aworaki nan ta midi y haya informacion actual for di aworaki, prome cu nan procesa e informacion, y e ta tarda un rato pasobra nan tin cu edita, screen, y valida, prome cu nan por duna e resultadonan.
“Eigenlijk loke nos ta saca ta e tasa di desempleo, cu ta duna indicacion di e cantidad di hendenan cu no tin un empleo, y cu ta buscando trabao na e momento aki. Anto, esey ta un indicador hopi importante pa nos di labor, pero pa hopi instancia cu ta pidi pa e indicadornan aki pero tambe pa instancianan internacional”, señora Lee-Perez a menciona. El a sigui splica cu hopi biaha nan ta haya bishita di instancianan internacional cu ta pidi e indicadornan manera el a menciona.
“Akinan nos ta bay haya indicacion di e cantidad di hendenan cu ta buscando trabao, y un parti hopi importante di e onderzoek aki ta pa nos haya un bon bista di e composicion di e mercado laboral, y esey ta consisti di esnan cu ta trahando, esnan cu no tin trabao, y esnan cu ta inactivo. Den e parti di inactivo, despues cu nos ta presenta e resultadonan tambe”, señora Lee-Perez a señala.
El a subraya cu e parti di inactivo semper ta un grupo grandi, pasobra eyden ta cay tur e pensionadonan, pero tambe tur e hobennan di 15 aña pariba, cu ta bay scol.
El a agrega cu e survey ta pa esnan di 15 aña di edad bay ariba. “Esey por bisa cu, fuera di e composicion cu nos ta saca pa nos sa con e ta dividi, esey ta algo cu nan ta compara cu añanan prome, y asina por mira con e desaroyo ta. Si el a subi, of a baha, con e ta bayendo y tambe nos ta valid’e bek cu e situacion real, pasobra e datonan cu bo ta colecta mester representa si, e situacion real na Aruba”, sra. Lee-Perez a splica.
El a señala tambe cu e economia a pick up despues di e pandemia, y esey por mir’e tambe den e resultado di e indicadornan, cu ora nan a midi ta mustra cu e desempleo a baha e ultimo añanan aki.
“Kico ta e aña aki? Esaki ta loke eigenlijk nos no kier perde e oportunidad di midi, pa nos sa kico e ta. Nos ta tuma diferente datonan administrativo, y esey Banco Central tambe ta hacie pasobra bo no ta mire tur dia, pero bo ta sigui e desaroyonan si henter aña pa wak con e ta bayendo. Pero e ‘labor force survey’ aki, eigenlijk e ta pa capta full Aruba. Eigenlijk, e 3.500 numbernan cu nos ta bisa nos ta bay yama, cu ta participa den e huis-code, pasobra si no bo no tin un representacion completo di Aruba y nos tin cu asegura esey”, señora Yvonne Lee-Perez, di Departamento di Labor a señala.
