Compilacion di cifranan y informacion ta haci planificacion posibel
- Di produccion di awa y coriente pa industria adapta na futuro
- Exigencia laboral ta pone mas enfasis riba Enseñansa pa Empleo
ORANJESTAD (AAN)- Naturalesa a entrega Aruba beach, solo y laman, cu den desaroyonan mundial a habri porta pa turismo, e ramo economico cu e era di jet y crucero a construi.
Economia di un pais tin necesidad di actividad comercial, cu ta produci trabou y entrada pa comunidad, cu na su turno ta entrega su servicio.
Na momento cu establece cual ta e ramo economico cu mester construi na un pais pa bienestar di hende, planificacion ta haya su inicio pa sigui cu adaptacion continuo.
Planificacion ta encera pa establece cuanto placa tin, cuanto inversionista cu lo participa cu proyectonan por atrae, cuanto trahador mester, cuanto gasto por haci.
Planificacion ta exigi estudio di informacionnan cu compila.
Pen y papel tabata sirbi, pa registra den procesonan cu ta tuma tempo y trabou, cuanto turista por atrae, kico e turistanan tabata kier, cuanto personal mester entre otro.
Cu introduccion di computer, di e sistema digital y asina Inteligencia Artificial, e capacidad di mente humano, a haya sosten di posibilidad pa na forma mucho mas facil yega na cifranan concreto pa loke e pais ta produci, e servicio cu e ta brinda, e grado di satisfaccion di su clientenan (pues turista tambe) y loke e mester brinda e turista.
Actualmente sector di turismo ta presenta REVPAR, cu ta loke cambernan di hotel ta produci na placa pa e empresa y na e pais pues, ta wordo presenta na Pueblo como cifranan cu ta necesario pa dicidi por ehempel con e entrada di turismo na e pais lo ta, con sano e ramo di economia ta y e posibilidad pa e produci cupo di trabou y tambe sostene proyectonan importante cu e comunidad mester haci pa e ciudadanonan mes pero tambe pa turismo.
Ciudadano y turista ta hende, cu mester por ehempel di awa pa bebe, cuminda pa come y cas pa biba aden.
Ciudadano y turista mester di productonan cu ta resultado di industrialisacion y e base infrastructural cu ta necesario den esaki.
Un pais, turismo y hende mester di un base economico y un infrastructura cu ta sostene necesidad di economia, cu ta productor di placa.
Un pais mester di un planta di awa y coriente. E mester di caretera. E mester di edificionan. E mester di school y asina nos por sigui.
Pa tur e necesidadnan ta di acuerdo cu e realidad di e pais, mester di cifra y informacion cu ta na nan turno e base pa dicidi pa tamaño y contenido di proyectonan necesario pa funcionamento di economia.
Pa yega na calculacion, mester pone cifranan hunto cu ta un trabou enorme sigur den pasado cu mester a haci uzo di pen y papel.
Awe, sinembargo, un compania cu ta produci awa y coriente ta capaz na bisa kico e produccion mester ta, cuanto placa tin pa paga y cuanto placa e lo genera pa sigui existi.
Sistemanan digital, cu computer a haci posibel, ta produci informacion necesario pa asina por sirbi economia, productor di trabou, rapidamente.
Sistemanan digital ta haci posibel pa compila informacion di paisnan competidor di Aruba y yega na e conclusion con Aruba por enfrenta competencia dor di entrega na turismo, tur informacion necesario.
E informacionnan aki ta sirbi como base pa proyectonan di hotel. Pa decisionnan cu mester wordo tuma riba e cantidad di awa y coriente cu mester wordo produci. Riba e tipo di restaurantnan cu mester. E cremanan cu ta proteha contra solo, cu mester wordo importa y e cantidad di avionnan y barconan cu mester pa trece turista.
Economia di un pais ta depende di e actividadnan comercial cu na su turno ta depende grandemente tambe di e disponibilidad di trahador cu por presta servicionan cu economia ta rekeri.
E transicion pa e Era di Inteligencia Artificial ta exigi asina disponibilidad di trahador prepara pa encarga nan mes cu tareanan cu ta keda den man di hende pa realisa y garantisa continuacion di progreso.
Esaki ta nifica cu e trahador mester tin preparacion pa atende activamente cu produccion a base di conocemento digital riba su tereno.
E transicion pa e Era Digital a conoce miedo cu Inteligencia Artificial lo deshaci di cupo di trabou, loke ta un hecho tambe ya cu trabou ta wordo facilita.
Di otro banda cuponen nobo di trabou ta habri den economia renoba cu ta resultado di e Era Digital den un mundo nobo!
Inteligencia Artificial no ta un asunto di extre terestre, pero di nos bida directo den e comunidad mundial nobo cu e era digital ta crea na caminda pa un futuro cu mas oportunidad pa sirbi hende y comunidad.
E importancia di Enseñansa pa Empleo, cu ta cumpli cu e exigencia aki den e culminacion di transicion pa e Era di Inteligencia Artificial, ta wordo confirma.
