ORANJESTAD (AAN): Den proceso di construccion di un Substation nobo na Sabana Blanco, e compania NV Elmar ta realocando diferente kabel di 60KV.
Pa realisa e trabao aki, nos a kita carga di e kabelnan cu lo worde realoca y transferi esaki pa kabelnan alternativo pa asina nos por sigui distribui coriente. Regularmente NV Elmar ta realisa trabaonan sin interumpi e servicio di coriente door di transferi carga pa rutanan alternativo
Manera ya ta conoci, Diamars 8 di Augustus, durante e trabaonan tumando lugar na e Substation Sabana Blanco, un contratista encarga cu realoca diferente kabelnan a dal y daña e kabel di transmision di coriente di 60KV cu ta bay Onderstation Paardenbaai, cual ta suministra coriente na e area di Centro di Playa y vecindario. E suceso aki a resulta den un interupcion di servicio di coriente.
Elmar a interumpi e servicio di coriente den Centro di Playa inmediatemente despues cu e kabel a ser daña. Pa evita cualkier potencial peliger y garantisa e siguridad di e tecniconan na e lugar di e incidente. Simultaneamente, pa isola e seccion daña di e kabel y scapa e restante di e kabel di transmision, y tambe e instalacion di 60KV.
Despues cu e tecniconan di NV Elmar a isola e problema cu e kabel di transmision aki, nan a implementa un solucion pa transferi e carga di e kabel cu a kibra pa otro kabelnan. Esaki ta posibel door di e flexibilidad di e grid di coriente di Elmar. Asina nan a reestablece e suministro di coriente den e area afecta via rutanan alternativo. Den tur situacion di interupcion di servicio, si ta posibel, Elmar ta transferi e carga pa kabelnan alternativo pa reestablece suministro di coriente mas liher posibel.
Manera ya menciona, regularmente Elmar ta realisa trabaonan sin interumpi e servicio di coriente door di transferi carga pa rutanan alternativo. Pero e proceso di transferi carga por medio di otro kabelnan pa reestablece e suministro di coriente despues di e suceso na Substation Sabana Blanco a crea un situacion delicado, door cu e kabelnan alternativo tabata cargando un cantidad grandi di coriente adi conal caba door di trabaonan cu ta andando na Substation Sabana Blanco, den proceso di construccion di un Substation nobo. Esaki ta pone un reto adicional pa nos team di tecnico. Door cu e suceso di Diamars a resulta cu nan mester transferi e carga di un kabel daña pa mas kabelnan alternativo.
Debi cu nan tecniconan na e lugar a interumpi e servicio di coriente inmediatamente despues di e suceso, nos a scapa e restante di e kabel di transmision, y tambe e instalacion di 60KV. Manera ya menciona den e relato di ELMAR riba e suceso, inmediatamente despues di e suceso nos team di GIS a cuminsa diseña un plan pa realoca e kabel di transmision di 60KV, trahando cu rapidez y seriedad pa trata e situacion actual.
Desde Diaranson 9 di augustus, nos team di Underground Services (Kabelafdeling) a cuminsa ehecuta e plan pa drecha y realoca e kabel pa asina reestablece operacion normal. Alavez Elmar ta reenforsando e team cu tecniconan adicional di Prysmian di Hulanda riba caminda pa yuda cu e situacion actual. E trabaonan aki lo tin un duracion di mas o menos 2 siman.
E tecniconan lo monitor e situacion aki durante henter e periodo menciona. Elmar ta mantene su compromiso pa informa comunidad tocante e desaroyonan y avansenan durante e proceso di reestablecimento. Nan ta gradici e clientenan pa nan comprension y confianza.
