Prome Ministro di Reino Uni a wordo nombra siman pasa
*Den ambiente di un conflicto mundial y conflicto Mancomunidad
*E reserva di e generacion di ayera y e deseo di generacion nobo
ORANJESTAD(AAN)—Reina Elisabeth II por wordo considera un Reina excepcional. Durante 70 aña e tabata Reina no solamente di Reino Uni y e Mancomunidad di Gran Bretaña, cu ta representa un tercer parti di e poblacion mundial.
Mundo henter a wordo inspira dor di e Reina, cu a skirbi un historia di inspiracion.
Ta hustamente e loke Reina Elizabeth II a nifica pa henter mundo, awe ta entrega un tarea mas dificil na su yiu mayor Rey Charles III, cu na un edad halto ta asumi trono di un mundo maneha pa un generacion nobo.
Un lista largo di reto ta spera Rey Charles III, cu awe mester duna prueba di aceptacion na su propio pais pero tambe na tur parti di e Mancomunidad Britanico.
“Principe Charles lo logra bira Rey un dia?” Esaki tabata e pregunta cu a wordo haci hopi tempo dor di un mundo den cual hopi tin reserva enfrente e monarca nobo.
E prome matrimonio di Rey Charles III a entrega Pueblo di Gran Bretaña e mundo di encanto di un pareha hoben. Princesa Diana a cumpra curazon di mundo, cu pa un gran parti no por a acepta fin di e matrimonio y sigur e morto horibel di Princesa Diana.
Uno di e problemanan mas grandi cu Reina Elizabeth II mester a resolve tabata hustamente e matrimonio entre su yiu mayor y e actual Reina Consorte Camilla. Sin duda e persona di Reina Elizabeth II a haci e matrimonio finalmente aceptabel cerca un grupo grandi cu tabata contra.
Kico lo pasa den seno familiar di Rey Charles III? E problemanan cu su yiu Principe Harry y su esposa Meghan Markle ta conoci. Un buki nobo den cual Principe Harry ta presenta episodionan nobo di su relacion cu Corona Ingles, ta wordo spera pa fin di 2022.
Liz Truss ta nomber di e Prome Ministro nobo di Reino Uni y a wordo nombra dor di Reina Elizabeth II siman pasa.
Esaki ta nifica cu un gobernante politico nobo ta na cabez di e pais durante e prome parti di e Reinada di Rey Charles III, na un momento cu e conflicto na Ukraine ta den atencion mundial.
E situacion mundial ta uno di inflacion pa loke ta trata situacion financiero y sigur cerca e generacion nobo e gastonan di Realesa ta hopi comenta.
Tin un diferencia grandi di edad entre e Rey nobo y e generacion cu awor ta bira activo na Gran Bretaña.
E Principe Heredero William lo por percura pa acercamento nobo? Hopi a pensa cu cu su tata lo no a bira Rey pero lo a pasa su derecho directamente pa Principe William.
Mientras Prome Ministro Liz Truss y miembronan senior di su gobierno a haci huramento di lealtad na Rey Charles III na un pais cu monarquia constitucional, e sonido di cantidad di paisnan di miembronan di Mancomunidad, ta bira mas fuerte.
Ayera ya 2 di e paisnan a mustra cu nan no kier Rey Charles III como Hefe di Estado y cu nan kier bira republica.
Un temporada dificil ta spera e Rey nobo di Gran Bretaña, sigur despues di e epoca di Reina Elizabeth II, cu durante e parti di mas grandi di su bida tabata Reina mientras Rey Charles III na edad di pensionado ta bira Rey di un generacion nobo den e traspaso di poder economico y financiero mundial, cu mester culmina na 2025.
