Colombia kier probecha di e cantidad grandi di Biento y Solo di La Guajira

ORANJESTAD (AAN):  Colombia tin e intencion di probecha di e cantidad grandi di biento  cu ta supla den e region Caribe Colombiano, esta La Guajira,  pa genera energia limpi pa e pais.

   Mirando cu e velocidad di biento den e area di La Guajira ta dobel di e promedio mundial y radiacion (di solo) ta 60% mas di locual ta wordo registra na e otro areanan na nos planeta, La Guajira ta bira un area di hopi interes pa inversionistanan.

   Na aña 2004, e parke di molina di biento, Jepirachi a wordo instala na Uribia, La Guajira, cu un capacidad di 19.5 Megawatts.  Na comienso di aña 2022, Colombia a inaugura su di dos Parke di Molina, cuminsando cu e proyecto Guajira 1.  Actualmente ambos Parke di Molina tin e capacidad pa genera 20 megawatts, ekivalente na e consumo di energia pa 30.000 hogar.

   Guajira 1 ta e prome proyecto cu a wordo construi despues di aña 2004, pero esaki lo no ta e ultimo.  Segun e plan di desaroyo 2020-2023 titula “Uni pa un Cambio”, Tin 65 proyecto nan di Molina di Biento y Parke Solar para den fila den e parti meymey y den e parti mas ariba di Guajira, especialmente na Uribia y Maicao.

   E potencial di e area ta tal cu si utilisa solamente 50% di e teritorio, esaki por genera alrededor di 15.000 megawatt di potencia, den otro palabra,  esaki ta e capacidad total cu ta ser genera pa henter Colombia awendia.

   Actualmente tin miyones di tonelada di elementonan di biento cu ya a yega pa e construccionnan di e Parke Alpha y Beta, di e compania Portuguese EDP Renewables, na e parti Norte di e departamento. Esaki  lo tin capacidad cerca di 500 megawatts, ekivalente na e suministro di energia pa 3 miyon hende. Otro companianan cu ya tin plan pa instala parkenan solar ta Enel Green Power, EPM, Jemeiwaa Ka’i y Celsia.

   Colombia tin e compromiso di tuma accion pa cu cambio climatico den cumplimento cu e acuerdo di Paris. Apesar di ta un pais cu ta representa alrededor di 0,4% di e emisionnan global, Colombia su obhetivo nan actual ta un di mas ambicioso den e region Latino America y Caribe y cu ta den liña pa logra e obhetivo di Neutralidad di Carbon pa aña 2050.