BARRANQUILLA: Tabata 27 di Augustus 2021, esta mas di 1 aña pasa,
cu su amigonan a haci denuncia na autoridad cu e stranhero aki a desaparece. E tabatin varios luna ta biba na Barranquilla. Awor ya mas di un aña a pasa sin cu su amigonan, y tampoco su famianan na Hulandes mes no sa kico a pasa cune.
Sigur esaki ta un caso yena di incertidumbre! Tabata dia 27 di Augustus 2021 cu nan a mira Willem pa ultimo biaha den oranan di mainta. Su amigonan na Barranquilla no a sospecha nada, te ora cu dia a caba y no tin pista mas di dje. Pesey Viviana Angulo Muñoz y algun persona mas a bay bati alarma na autoridad pa splica cu Willem no a regresa cas mas.
E relato oficial di Polis, cu a wordo manda pa varios punto hudicial, ta bisa cu ta buscando Guillermo Willem Kees Sas di 49 aña di edad, di nacionalidad Hulandes.
Den e mesun boletin, ta pone cu e homber tabatin un sweater blauw, un bermuda short di jeans, keds color preto. E ta mustra cu e tin estatura di 1,85 meter, e tin un postura delega, color di cuero ta blanco, y tin cabey blond, wowo blauw, nanishi fini, y tattoo di flor y barbulet poni casi full riba ambos braza.
E potret di dje a wordo poni tambe riba e website di HOPE (Hagamos Obligatorio Poder Encontrarlos) di Instituto de Medicina Legal y Ciencias Forenses.
Despues di un luna cu e no a aparece mas, su amiga a pone un video riba TikTok, unda bo ta tende e amiga bisa: “Esaki ta mi amigo Guillermo, un Hulandes cu mi a conoce na Barranquilla. Cu hopi ilusion el a contact mi pa mustre algun propiedad na benta, ya cu su soño grandi tabata pa inverti y biba den nos ciudad.”
Asina a haya sa cu na 2020 Kees Sas a viaha pa Colombia y a conoce ‘La Arenosa’, cu ta e nomber di cariño pa Barranquilla.
Den e video el a bisa cu ultimo biaha cu a mire tabata 27 Augustus 2021, y nan no sa nada di su paradero. Pesey ta pidi esnan di Barranquilla pa share e video pa por logra localiza e Hulandes. Su famianan na Hulanda y amigonan na Barranquilla ta hopi preocupa y nan ta teme pa su bida.
Famianan na Hulanda a bisa cu nan a pasa un aña hopi complica pa e desaparicion di Kees Sas. Nan a bisa cu ainda nan ta hopi nervioso, pasobra nan no sa kico exactamente lo por a socede cune.
