E prome trayecto di Formacion Social pa Damas tabata exitoso y awor ta bay start cu e di dos grupo

Hobennan por inscribi caba!

ORANJESTAD (AAN): Formacion Social ta prepara pa cuminza cu nan di dos trayectoria, dirigi riba Damanan.

   Esey ta loke e coordinador di SVT (Sociale Vormings Traject), Jessy Ras a confirma na DIARIO.

   E asina yama SVT2-Dames lo cuminza dia 22 di Augustus 2022.

   El a bisa cu inscripcion a habri pa un grupo nobo di mucha muher, y awor nan ta encarga nan mes cu promove e trayecto aki.  Pa mustra e damanan hoben, cu esaki ta nan chens pa haci un cambio positivo den bida.

   Formacion Social ta algo pa bo of no:  Bo ta un hoben femenino enre 18 y 24 aña di edad?  Bo no a termina un Scol Secundario?  Bo kier mehora bo oportunidad pa trabao?  Bo kier un cambio positivo den bo bida?  Bo a termina un Scol Secundario y ta sin trabao?

   Bo por inscribi e ora pa Formacion Social.  DIARIO a compronde cu e oficina di SVT ta na Mariniers Kazerne Savaneta, na ‘Bureau Sociale Vorming’.

   Esun di aña pasa a bay bon:  Segun señora Jessica Ras, e prome grupo di damas (SVT1-Dames) tabata un proyecto piloto, cu a nace despues cu nan a pasa door di 14 trayecto caba cu esnan masculino, cualnan ta funcionando desde 2011 caba.

   Na 2021 a cuminza cu grupo di damanan hoben y e tabata un exito.  Pesey awor nan ta bayendo pa cuminza cu grupo 2 di mucha muher.

   Como cu ta prome biaha nan a haci esaki cu e ser femenino, e organizadornan a haya experiencia riba cierto aspecto cu nan tin di tene cuenta cune, y varios punto cu lo tin di bay haci mihor pa e Trayecto 2 aki di Damas.

   Semper ta keda busca forma pa mehora tur Trayecto, incluyendo esnan cu nan a prepara pa gruponan masculino.  Pesey na final di cada Trayecto nan ta haci un evaluacion, pa analisa loke a bay bon y loke a bay menos bon.  Asina nan ta logra adapta e sistema pa e siguiente grupo.

   Segun Ras, esey ta loke nan ta bay haci tambe pa e grupo nobo aki di SVT-2 di Damas.  Nan ta tene cuenta tambe cu e aspectonan cu e Trayecto pa ser femenino tin di ta tiki diferente.

   Pero el a mustra cu e muhernan hoben a haci casi mesun aspecto di les cu e hombernan hoben.  Claro, nan a cana un tiki menos, pero si tabatin mesun hopi equipahe poni den nan rugtas ora di haci esey.

  E animo di e prome grupo di Damas di aña pasa tabata hopi grandi pa mira, e interes, y e motivacion di e damanan tambe.  Ras a splica cu ora nan a cuminza cu e prome grupo di Damas, a start cu 14 dama.  Anto 8 dama a finaliza e prome parti, y e di dos parti cu nan ta core stage y sigui curso y bishita Kazerne un biaha pa siman, ainda tin 8 dama haciendo e trayecto.

   Mayoria di e damanan ta bayendo bon, y algun cu de vez en cuando tin di sigui duna nan e sosten.

   Mayornan por tin e confianza cu nan yiunan lo sigui e bon rumbo den e Formacion Social pa Damas.  Nan lo haya guia di miembronan di kader di Arumil y SVT cu ta cla pa e reto di grupo 2 di Damas.

   Pa inscribi por yama 522-5352 of via:

This email address is being protected from spambots. You need JavaScript enabled to view it.