E prome brinda y scoter tradicional di Pasco

E rumannan Werleman a conta tambe cu den e tempo aya, tempo di nan tempo, den e Santa Cruz di antes den mondi p’ariba ya unda nan tawata biba,

riba e dia di Pasco, tur mucha tawata bisti nan shimis y sapato nobo, hopi biaha, esunnan cu a bira chikito pa e yiu di bisiña. Y contento nan ta sali na pia hunto cu famia pa bishita famia y bisiña. 

E tempo aya, no tawata cos cu mester a haci cita prome cu bishita. Tawata cuenta di cana yega na cas di hende y tawata pasa na un pa un duna man y bisa Bon Pasco. Un bishita cu aunke tawata cortico, semper e doño di cas tawatin algo pa brinda prome cu bishita bay. 

E ruman muhenan a conta cu e prome brindis semper tawata e Cuciu (Coecoei) of bloedwijn cu un pida bolo di fruta. Y tur mucha tawata ansioso ta warda pa e scoter tradicional di Pasco, cu cheeweese, pinda, sunchi, pruim, buscuchi Maria, mangel di pinda y e chiclets den paki geel. Esta un tesoro simpel, pero te awe, ta hopi hende cu e tempo ey tawata mucha, ta carga esaki como un recuerdo special. 

Tur cas cu bo bishita, bo tawata haya mesun patronchi; duna Bon Pasco, brinda, come, duna man, sinti cariño y bay pa e siguiente bishita. Na mita caminda, bo lampet ta yen, pero hey, ta tradicion, mester sigui y ademas, nan tawata cuminsa pidi e scoter tradicional pa hiba cas. 

Segun e rumanan a conta, muchanan y hende muhenan ta bay cas. E hende hombernan mayoria biaha ta keda atras pa bati bleki y bebe rum di caña of Genever Bols. Tin biaha nan tawata yega cas te ora solo baha. 

E di dos dia di Pasco, ta sigui bishita esnan cu no a alcansa bishita riba dia di Pasco. Y asina, e tradicion a sigui. Y hopi di nos ciudadanonan ainda ta corda e manera cu tawata celebra Pasco antes. Un tradicion cu no a pasa pa e generacion aki, pero e nificacion di Pasco no a cambia. Nos pueblo ta keda gradici pa tur bondad ricibi y pa Jesus, cu ta e berdadero centro di Pasco.