Geraldine Lacle di Fundacion e Poder den Mi:
ORANJESTAD (AAN): Riba Diadomingo 21 di December, mundo a observa Dia Mundial di Meditacion. E observacion aki ta yega manera un boton di pausa global, un invitacion pa humanidad aleha di tur desordo y bay den e camber silencioso di e mente. Den tur rincon di mundo, hende ta busca un lugar pa medita y realinea nan mes cu proposito y pa recorda cu mientras mundo ta acelerando, crecemento interior ta pasa solamente ora nos scoge pa para keto, y bay bek na trankilidad.
Den un entrevista recien cu DIARIO, Directora di Fundacion ‘e Poder den Mi’ señora Geraldine Lacle a enfatisa e importancia pa tuma tempo pa medita. Fundacion ‘e Poder den Mi’ ta un organizacion sin fin di lucro cu ta dedica na guia hende den meditacion Estado Alfa prinicipalmente.
Segun señora Lacle, Meditacion Estado Alfa ta fundamental pa transformacion intencional. “Ora un hende drenta den estado di onda cerebral Alfa, e ta habri un porta pa creatividad mas halto y receptividad mas profundo. Manifestacion ta bira intencional, no accidental. Tur hende cu tin gana pa crece por siña e arte aki. E fundacion ta existi pa motiva, inspira, yuda y empodera tur esnan cu ta habri nan mes pa crecemento personal y spiritual.
Señora Lacle a remarca cu Fundacion e Poder den Mi ta sigui e guiansa y enseñansa di gran maestronan entre otro Dr. Joseph Murphy, Neville Goddard, Conny Mendez, Jose Silva, y Louise Hay. Nan enseñansa ta destaca e capacidad profundo di e mente subconsciente y di e leynan di creaccion. Pa medio di workshops, programanan y contenido educativo, e fundacion ta yuda individuonan pa comprende y practica Estado Alfa pa engrandece nan experiencia den meditacion.
Comunicacion cu comunidad, señora Lacle ta enfatisa, ta clave. Tur dia e fundacion ta comparti “Mensahe di Dia” riba Instagram y via WhatsApp, nan ta publica video inspiracional riba YouTube, y un biaha pa luna ta trata pa reuni na beach pa Meditacion Estado Alfa — un mescla di respiracion, intencion y naturalesa.
Na final di e entrevista, señora Lacle a laga atras un mensahe special pa tur cu kier haci Meditacion Estado Alfa: “Duna bo mes permiso pa pausa. Drenta den silencio. Sinti bo poder interior. Bo transformacion ta cuminsa e momento cu bo sinti bo ser interior.
Pa mas informacion, por tuma contacto cu señora Geraldine Lacle via pagina di Instagram of na This email address is being protected from spambots. You need JavaScript enabled to view it..
