Candidatura riba un lista politico mester ta basa riba principionan y ideal - *E motibo cu hende ta drenta politica no por ta superacion di situacion personal - *Formacion di partidonan nobo hopi bez no ta basa riba union di pensamento
ORANJESTAD (AAN) — E lucha di Status Aparte, a haci cu mas cu na hopi pais, e ciudadano ta conoci cu eleccion como instrumento di democracia.
Status Aparte di Aruba tabata directamente mara na e proceso electoral te na e momento cu na 1985 Aruba a alcansa su Status Aparte y e situacion social cu salida di Lago a crea a bira motibo principal pa voto di e Arubiano.
E generacion di mas edad di Arubiano, ta mira ainda e proceso electoral cu wowo diferente for di e Arubianonan mas hoben.
E surgimento di partidonan y politiconan nobo na Aruba, awe ta sigui mas un tendencia internacional caminda ta mira cu democracia ta habri caminda pa un plataforma nobo pa hende lansa nan mes den politica.
Den e proceso un peliger nobo ta habri, cu ta e peliger cu e proceso democratico ta wordo maluza pa otro metanan, cu no ta siguimento di idealnan y principionan comun.
E fenomeno cu ta manifesta su mes na Aruba, manera ya a wordo bisa, ta presenta su mes rond mundo. E peliger ta, cu e interes general cu mester ta base pa participacion na un partido politico, ta bay perdi den e interes personal ya cu politica ta contene e peliger cu hende ta busca crecemento personal den politica, cu ta habri porta pa ascenso social.
Durante e ultimo eleccion na Aruba, por a mira un crecemento di e cantidad di partidonan cu a participa y cu a afecta e cantidad di votadornan disponibel pa partidonan existente.
Cantidad di thesis, hasta sin base, ta wordo uza pa splica loke a pasa durante un eleccion pero atencion no ta wordo dedica na un forma suficiente na e forma cu listanan di candidatonan ta wordo crea.
Den pasado un candidato politico, tabata tin un trayectoria den su partido. Aki imediatamente mester deshaci di e pensamento cu ta persona cu cierto nivel educativo so por a yega e rangonan mas halto den politica.
Partidonan politico tabata tin nan propio forma di formacion politico sigur ora politica a madura na Aruba mescos cu mayoria di partidonan na mundo liber.
Un union den pensamento y ideal tabata uni e candidatonan, cu tambe tabata tin mas contacto y union cu otro pasohra no tabata sin mas cu un persona ta subi lista.
Awe por nota con na ultimo momento ainda, hende ta uni cu otro pa forma un lista di candidato di partido. Hende cu practicamente no conoce otro ta uni den partido y no semper esaki ta basa riba principio ni ideal.
Nos mester ta honesto y realisa cu politica ta duna un ciudadano cierto importancia y hasta entrada y beneficionan cu antes no tabata existi.
E hecho cu un miembro di Parlamento ta haya un salario pa un trabou completo, no ta algo cu semper a existi. E realidad nobo ta haci cu e Miembro di Parlamento tin un bon entrada pero ademas ta subi na e nivel social.
Durante formacion di lista di candidato por nota tambe cu partidonan ta trata di atrae hende conoci den comunidad pa asina atrae voto sin duna tempo pa candidatonan bira parti di un union di ideal y hasta moral.
DIARIO for di momento cu e cantidad di partido tabata aumenta ya tabata preocupa cu e situacion. Awe e problemanan interno cu ta presenta ta sin duda un situacion dificil mas pa mundo politico, cu ta e mundo finalmente mester dicidi pa bienestar di e pais.
Un mundo pues cu mester di mas cu un participacion estilo club social y den cual mester tene na consideracion e beneficionan monetario y social cu ta spera e politico sigur si e drenta Parlamento of bira parti di Gobierno.
