ORANJESTAD (AAN): Fundacion Ateliers'89 a keda opera durante pandemia, enfrentando y a sobresali obstaculonan cu COVID-19 a trece dilanti,
Ateliers nunca stop di funciona como punto di arte na Aruba. Nan ta e unico organisacion cu a duna taller online pa asina sigui ofrece diferente disciplina di arte na esnan interesa den mundo di arte y asina comparti nan conocimento na un manera gratuito.
Tur aña nan ta presenta nan defile di moda anual den grandi, apesar cu tur medida di covid, Ateliers'89 a adapta na normanan nobo. Cu un gran colaboracion di CheckPoint Color y Semi Chahmi, bao direction di Chelsea Peterson nan a presenta pa prome biaha, un online video fashion show, ilustrando den forma aki tur e creacionnan di moda di tur participante.
Cu aporte di Mondriaan Funds pa COVID, Ateliers'89 a logra yuda 17 artista di Aruba cu subsidio generoso y asina crea e exposicion yama P A N.
PAN ta Dios di PANDEMIA, tambe Dios di Artistanan. PAN ta pan cu Artistanan no haya durante Covid19. Referiendo na esaki a puntra artistanan pa traha obra cu tin di haber cu concepto aki, unda cu lo wordo mira den exposicion e creacion di diferente artista cu tin di haber cu tema. Artistanan a wordo escogi no solamente pa nan obra pero tambe paso nan ta artista di Ateliers’89 bou di curadoria di Elvis Lopez, director di Ateliers’89.
Artistanan participando cu un gran exposicion cu multi-disciplina di arte manera: video, fotografia, pintura, instalacion y escultura. E lista di artistanan ta: Velvet Zoe Ramos, Anuar Habibe, Jess Wolff, Armando Goedgedrag, Desiree Sporkslede, Brunal Anaya, Suyin Ridderstaat, Samuel Sarmiento, Chelsea Peterson, Danilo Geerman, Romelinda Maldonado, Fernando Vermeer, Sharelly Emanuelson, Ken Wolff, Irvin Aguilar y Wilfred Jansen.
Ateliers’89 ta contento di por anuncia cu desde diamars, nan a reinventa nan mes cu un imagen completamente nobo, cambiando nan nomber, logo y website pa Punto di Bellas Arte Aruba. E imagen nobo di nan website ta traha den forma pa ta mas visualmente atractivo y facil di haya cualkier informacion di nan organizacion. Tambe por busca tur actividad cu nan a yega di organiza den pasado, presente y futuro. Un website educativo unda no solamente por haya sa tur loke nan ta representa pero tambe por conoce e artistanan y obranan cu wordo traha den workshopnan. Punto como centro di encuentro y educacion di artistanan y arte en general di Aruba ta significa Punto di Bellas Arte Aruba.
Alavez Fresh Milk Barbados, ARC inc, Sint Vincent y otro islanan di Caribe hunto cu Punto di Bellas Arte ta participa den Online Caribbean Linked VI 2021, anticipando presentacion en bibo di Caribbean Linked VI 2022 na ubicacion local di Punto di Bellas Arte Aruba.
Ateliers’89 ta invita tur hende pa presencia nan prome evento di verano, e gran exposicion di nan artistanan pa apertura PAN, riba diadomingo 11 Juli, 2021 pa 8'or di anochi. Entrada ta gratis.
