Destinacion mester expone loke e turista mes no ta mira --- *Tragedia riba lama ta bati alarma den un mundo di aventura --- *Aruba enfrenta cu un reto importante den recuperacion di turismo
ORANJESTAD(AAN)—Uno di e experiencianan mas grandi cu e pandemia Covid-19 a laga atras pa Aruba tabata, e hecho con den corto tempo economia di Aruba a wordo paralisa cu tur resultado cu e tabata tin.
E posibilidadnan pero tambe e peligernan y exigencianan mara na turismo, tabata e pakete cu DIARIO semper a mantene como base for di inicio di su existencia, poco tempo prome cu Aruba a conoce e caida di su pilar petrolero cu salida di Lago.
Turismo a keda como e unico pilar di economia di e pais y semper DIARIO a adverti pa e peliger grandi ora hinca tur webo den un solo macuto.
Turismo ta uno di e basenan pa economia mas preferi pa paisnan cu kier conoce desaroyo rapido.
E crecemento economico cu un maneho dirigi riba turismo por nifica, ta sumamente grandi y ta plama riba tur sector na forma directo y indirecto.
Sinembargo, turismo ta e sector economico mas vulnerabel y por wordo afecta na forma drastico, manera na 2020 Aruba a realisa ora Covid-19 a bati na porta.
Comercio internacional a sigui, aunke cu influencia negativo di e pandemia. Agricultura a continua. Asina por sigui cu practicamente tur sector aunke nan a conoce caida.
Turismo, sinembargo, pa motibo di e Coronavirus nobo, a wordo completamente descontinua.
Awe Aruba ta lucha pa regresa na su volumen normal di turismo.
Por nota con Prome Ministro Evelyn Wever-Croes semper a mustra Aruba, cu mester reduci Covid-19 na Aruba pa asina baha y deshaci di e peliger cu e ta pa turismo na Aruba.
E motibo cu Prome Ministro Wever-Croes a haci esaki ta, cu mal propaganda pa un pais sea pa motibo di pandemia, peliger di catastrofe natural, un indice halto di crimen, pues tur loke ta negativo, ta afecta e industria di turismo di e pais.
Uno di e motibonan mas grandi di exito di turismo na Aruba, tabata su beachnan unico.
E turista cu ta bini Aruba, ta busca solo, lama y Arubianismo.
Lama! Uno di e regalonan mas grandi di naturalesa pero tambe uno di e peligernan mas grandi pa hende, hasta landador.
E beachnan na Aruba ta atrae turista, cu ta bolbe nan pais pa haci propaganda pa Aruba of pa hiba mal noticia, cu tambe ta plama rapidamente.
E accidente den cual un hoben a perde su bida, a haya hopi cobertura.
Accidente por pasa tur caminda, pero accidente mester wordo preveni te na un maximo na un isla di turismo.
Personanan cu ta traha den turismo conoce hasta trampanan cu ta wordo traha dor di personanan di mala fe cu ta bishita un pais, ta sigura nan mes un bon seguro cu nan por bay claim si nan sufri pa cualkier incidente cu no a wordo preveni.
Un destinacion turistico mester prepara su mes contra mala fe pero tambe inocencia di personanan cu no ta mira peliger den un mundo cu mas y mas ta reta peligro.
Turismo di aventura sigur ta popular cerca hobennan mescos cu atraccionnan moderno cu ta contene un grado halto di peliger.
Aruba na e momentonan aki ta bandona e tempo di pandemia, cu nos ta spera lo keda pa pasado si tur hende coopera pa asina turismo por conoce mehoracion.
Na mes momento den e temporada aki, mester tene na consideracion e entusiasmo pa campa, pa deporte riba lama cu ta atrae ciudadanonan y turistanan.
Medidanan mester wordo tuma pa e temporada nos dilanti por ta uno di gozo pa Arubianonan y bishitantenan y inicio di un epoca nobo.
Den esaki prevencion di accidentenan y tur otro aspecto cu por mishi cu bienestar di Aruba mester haya prioridad cerca autoridad riba tur tereno pero tambe cerca tur ciudadano pa hunto por sigui traha riba recuperacion economico di Aruba.
