ORANJESTAD (AAN): Parlamentario Ricky Hoek di MEP ta indica cu libertad di expression ta un di e derechonan humano mas conoci y ta abarca diferente tema. En particular articulo 19 den e Declaracion Universal di Derecho Humano ta papia di esaki.
E articulo 19 ta bisa: tur persona tin derecho na Libertad di opinion y di expression. E derecho aki ta inclui e libertad di tin un opinion sin ningun tipo di interferencia y di busca, ricibi y difundi informacion y ideanan pa cualkier medio y sin consideracion di fronteranan. Den mi calidad di parlamentario cu ta para pa e derecho humano di e pueblo pa por ricibi noticia alcaso, mi lo presenta un mocion durante reunion di presupuesto 2022.
E mocion tin como meta pa acelera e proceso pa bin cu e Mediaraad (Conseho di Media) mas pronto cu ta posibel pa asina pone un paro na e iregularidadnan den media y hisa calidad di prensa na Aruba.
Dicon e mocion aki ta importante?
Un topico cu tabata hopi presente ultimo den prensa como tambe riba medionan social ta e Libertad di Prensa. E ta importante pa prensa por haci su trabou manera debe ser y busca informacion y tambe comparti informacion corecto basa riba hechonan pa asina duna e consumidor oportunidad y espacio pa forma su mesun opinion.
Sinembargo ultimamente por a tuma nota di un cantidad di disinformation y e posicion particularmente di e politiconan den prensa. Ta hopi importante pa bo por bisa y skirbi loke bo ta pensa. Pero tin ora tin e discusion riba cierto declaracion cu un persona ta trece publicamente, sea ta cuadra cu e realidad of no.
Considera por ehempel algun dia atras ora un medio di prensa, concientemente ta cambia e noticia su contenido cu ta basa riba hechonan y despues ta presenta na pueblo. Cu ta cambia e titulo di e noticia pa haci’e mas atractivo pa hende lesa por compronde, pero ora ta bay na cambia frase, cambia e contenido y crea cosnan cu no ta existi rond di un noticia djis pa ‘exposure’ y ‘fama’ e ora si ta un problema. Unda e liña di “Libertad” ta core? Ken ta dicidi kico e limitenan ta?
Kico e Mediaraad aki ta?
Banda di e derechonan humano, especialmente articulo 19, Prome Minister di Aruba Sra. Evelyn Wever-Croes ta menciona den su relato anual di 2021 – cu a ser publica 21 di maart 2022 – riba pagina 14 bou di punto 1.3 ‘Communicatie’, cu lo ta sigui traha riba e introduccion di un ‘Mediaraad’ (Conseho di Media).
E intencion ta cu e gobierno lo institui un fundacion bou di nomber ‘Mediaraad’. E Conseho di Media aki lo tin como tarea pa fungi como organo consultativo cu lo conseha tanto gobierno y e autoridad di control di telecomunicacion.
E consehonan lo ta riba un maneho di media, e ehecucion di maneho di informacion y asesora e medionan di comunicacion. E directiva di e Conseho di Media lo consisti di un presidente independiente, y un maximo di cuatro miembro mas.
E miembronan lo wordo nombra a base di un presentacion di candidato door di e radio emisoranan, prensa skirbi, emisoranan di television y e organisacion di consumidornan.
