E ser humano den e mundo di ilusion a entrega mundo un mensahe --- *Kico mundo ta considera awe como chistoso y nivel aceptabel --- *Artistanan como modelo di hende a pone mundo recapacita
ORANJESTAD(AAN)—Mundo di pelicula. Mundo di ilusion. Mundo, cu hopi hende kier sigui den nan bida di tur dia.
Si kier pa algo bira moda, mester percura pa personanan cu ta bida den e luz di publicidad, presenta e articulo.
Artistanan ta bira idolo cu mester wordo imita y ta hasta responsabel pa e grado di moral cu ta aceptabel den tempo moderno, sea cu nos kier acepta of no.
Ayera mundo a para keto un rato pa bolbe na e inicio di e industria di pelicula, cu ta presente den e nomber Hollywood, caminda e mundo di fantasia a culmina.
Aki por topa cu tur e formanan cu hende a haci posibel pa Mozes den nos epoca moderno habri lama den peliculanan di pasado pero tambe cu e bida moderno, cu tanto hende kier imita.
Oscar ta e nomber di e premio cu a wordo introduci na inicio di siglo pasa pa asina introduci exelencia riba tur tereno cu ta mara na produccion di un pelicula cu ta exigi tanto profesional.
E artista, sinembargo, cu ta presenta un figura na hende, ta keda central y su exito den mundo ta haci cu hende ta pone riba un pedestal aunke e ta keda hende.
Ayera por a mira kico ta biba den un artista ora Will Smith no por a contene su mes despues cu e presentador di e Premio Oscar, a lanza un joke den direccion di su esposa cu ta sufri di un enfermedad.
El a bay dilanti y a dal e presentador Rock den su cara dilanti un publico internacional.
Diripiente e artista a bira hende. Will, manera e mes a splica ayera ora el a bay excusa su mes enfrente e presentador, no por a contene su mes ora su esposa a wordo confronta cu un joke, cu mester considera di sumo mal gusto si tene na consideracion cu ta su enfermedad a haci cu el a luci su corte di cabey cu a bira centro di joke.
E pregunta grandi ta keda, kico a pasa cu nivel y aki nos no ta bay directamente na Will pero si na e presentador y e joke cu el a lansa dilanti un publico internacional.
Kico a pasa cu nivel? Pakico ta bay atende cu cabey di un hende na un momento cu henter mundo ta sintonisa?
Loke publico internacional no a realisa tabata cu entrega di Oscar ta un evento cu ta perde atencion internacional.
Pues a dicidi di atrae comediante como presentador y den esaki a bay haci “joke” cu na nos opinion no mester a wordo haci pasobra no tabata tin motibo pa e “
joke” cu tabata mishi cu un aspecto sumamente importante di un ser humano.
Ayera e evento Oscar a cay for di su pedestal. El a pone nos para keto.
Na momento cu mundo ta basha abou, e centro di idolonan tambe ta basha abou. E centro cu a dicidi riba moral di hende for di momento cu el a wordo institui y cu a mustra un cara falso di hende.
E artista ta hende, cu ta biba mescos cu tur hende pero e mester hunga un papel.
Ayera Will Smith a lubida cu e ta artista y a bira hende ora su esposa a wordo herida cu palabra.
Ta di aprecia cu Smith a coregi su mes y bisa cu el a actua robez. Di e forma aki e maximo evento di e mundo di strea di Hollywood a logra entrega na mundo e realidad, cu a bira tempo pa nos realisa kico ta nos modelo, nos forma di atende cu nos mes, cu hende y cu mundo!
