ORANJESTAD (AAN): Diego de Cuba di Sindicato STA (Sindicato di Trahadornan di Aruba) a laga sa diamars cu nan a entrega documento di 17 punto cu nan kier mira cambio den nan.
El a laga sa cu nan ta hopi contento cu e audiencia cu nan a haya cu Formador. Nan a haya oportunidad di expresa kico ta e cambionan cu STA ta desea di mira den e gobernacion nobo. Ta trata di cambionan di caracter di urgencia cu mester wordo implementa pa locual ta trata e clase trahador.
De Cuba a bisa cu tabata tin comprension pa locual a wordo treci pa dilanti. Tabata tin varios pregunta cu a bin dilanti tambe.
Tin un 5 punto cu sigur mester di mas atencion, pa e clase trahador por tin un bida mas humano, a enfatisa. El a menciona cu STA kier bin cu 40 ora pa siman den tur sector. Esaki kiermen cu den tur sector, pa tur hende cu ta traha aki na Aruba 40 ora y pa nan tin 2 dia liber pa siman.
Cu e sistema cu tin aworaki tin hendenan cu ta traha 40 ora, pero tin 48 ora, 44 ora y hendenan cu ta traha 6 dia pa siman. "Ki bida social e hendenan aki tin. Ki bida familiar nan por tin?", Diego de Cuba a remarca.
Tin di e hendenan aki cu trahando 48 ora te hasta ta traha 'overtime' y nan ni ta wak nan famia mes. Si bin un cambio den esaki den tur sector, manteniendo e salarionan cu e personanan aki tin, a agrega.
"Automaticamente bo functie uurloon lo hisa e ora eynan, pero ta algo cu nos ta kere cu lo bay faborece e pais aki". E hendenan lo tin mas tempo liber y lo ripara cu lo crea mas cupo di trabao pasobra e companianan lo tin mester di mas hende pa traha.
Tin cierto gremionan cu lo zapatia, pero sindicato STA ta kere cu e momento a yega pa introduci 40 ora di trabao pa siman den tur sector, 8 ora pa dia y den e 8 ora ora ey tin 30 minuut di break hinca den dje.
Esaki ta algo cu STA a enfatisa hopi riba dje.
