Estudio nobo a indica --- ORANJESTAD (AAN): Un di cada 10 persona por tin nivelnan clinicamente relevante di SARS-CoV-2 potencialmente infeccioso despues di periodo di cuarentena di 10 dia, segun un estudio nobo.
E estudio, dirigi pa Universidad di Exeter, a usa un prueba recientemente adapta cu por detecta si e virus ainda tabata potencialmente activo. E estudio a conta cu participacion di 176 persona cu a test positivo cu un standard PCR test.
E estudio, publica den International Journal of Infectious Diseases, a encontra cu 13 porciento di persona ainda ta presenta nivelnan clinicamente relevante di e virus despues di 10 dia, loke ta nifica cu potencialmente e persona ainda ta infeccioso. Algun persona a keda cu e nivelnan aki hasta pa 68 dia. E autornan ta kere cu e prueba aki mester wordo aplica den lugarnan na unda tin personanan mas vulnerable, pa para propagacion di COVID-19.
E profesor Lorna Harries, di Facultad di Medicina di Universidad di Exeter, a supervisa e estudio. El a indica cu: “Apesar cu e estudio aki ta relativamente chikito, nos resultadonan a sugeri cu e virus potencialmente activo tin biaha por persisti mas aya di un periodo di 10 dia y por representa un riesgo potencial di transmision. Ademas, no tabatin nada clinicamente destacable den e personanan aki, manera un condicion preexistente of nan tabata completamente saludable, loke ta nifica cu nos no por predeci ken si y ken no”.
E PCR test convencional ta funciona door di analiza e presencia di fragmentonan viral. Apesar cu e testnan aki ta detecta si un persona a wordo infecta cu e virus recientemente, nan no por detecta si ainda esaki ta activo y si e persona ta infeccioso. Sin embargo, e prueba usa den ultimo estudio ta duna un resultado positivo solamente ora e virus ta activo y ta potencialmente capaz di wordo transmiti.
E autor principal di e estudio, Merlin Davies, di Facultad di Medicina di Universidad di Exeter, a bisa: “Den algun lugar, manera personanan cu ta regresa na cas di cuido despues di un contagio, e personanan aki ainda por ta infeccioso despues di dies dia y por representa un riesgo pa salud publico. Ta necesario pa e personanan aki haci un test cu ta detecta cu e virus no ta activo y no sigui causa mas contagio. Nos mester haci un estudio mas amplio pa confirma esaki”.
