Nathalie Maduro, directora, ta enfatiza:
“E ta pa haci estudio, colecta data y informa”
ORANJESTAD (AAN) – Directora di Departamento di Agricultura, Cria y Pesca (LVV-Santa Rosa), señora Natalie Maduro, siguiendo cu e tema riba e importancia di conserva e abehanan local, el a indica cu pa motibonan fuera di alcance, e afdeling a keda un rato para. Santa Rosa mester bolbe set up e habitat.
Nathalie Maduro a señala cu un di e companianan cu e ta hopi contento cu ne, pasobra pa hopi aña caba, e ta purba di concientiza y bin cu programanan ta “Eco-Living”, cu awo ta bay yuda set up e habitat bek.
Natalie ta splica: “Nos tin varios Apicultor cu nos ta traha cu nan, manera meneer Winterdaal, y otro Apicultornan cu den caso di emergencia nos ta duna nan nomber si nos haya yamada, mientras tanto e seccion di Apicultura, eigenlijk, pa motibo fuera di nos alcance e colega no por a sigui den e funcion ey mas, y e afdeling a keda un rato para.
“Mi ta contento cu mi a haya e sosten aworaki di Eco Living, nos a acerca y pidi nan yuda nos, eigenlijk, set up nos afdeling bek. Mi tin cu enfatiza si, cu e motibo pakico nos tin e seccion aki no ta pa e produccion di honing. E ta pa nos haci estudio, pa nos colecta data. Si tin honing logicamente nos tin e disponibel pa esun cu lo kier cumpra, pero ‘forever’ e ta mas pa nos por crea e habitat bek. Na momento cu nos tin scolnan of si tin personanan cu kier sa mas informacion pa locual ta apicultura y kico ta e balor agrega di tin abeha den bo cunuco of den bo medio ambiente, cu nos por duna e tipo di splicacion ey, tambe”, Nathalie Maduro a duna di conoce.
Señora Maduro a indica cu señor Barros ta esun cu ta bay ta encarga pa yuda nan set’e up bek y lo agrega otro tipo di setupnan, cu Santa Rosa no a purba ainda.
“Mi ta kere cu ta importante pa e parti di educacion pa nos hendenan: 1. No wak abeha como un peliger. 2. Identifica e diferencia entre un abeha y un maribomba, pasobra esey tambe ta algo cu nos ta haya hopi biaha cu hendenan ta yama bisa cu nan tin abeha y nan tin problema cu bij, y ora cu e apicultor yega, e ta haye cu ta un grupo di maribomba. 3. Tambe pa mustra cu sin abeha no tin no tin cosecha”, Nathalie Maduro a subraya.
El a agrega cu por haci colonizacion pero e ta tuma hopi mas trabao, anto pakico no conserva un insecto cu ta hopi importante, cu ta traha un producto cu hopi di nos awendia ta uza, hendenan diabetico, por ehemplo, no ta uza sucu pero honey si. “Pero mi ta reitera cu pa Santa Rosa mes, e honing no ta importante. E bienestar di abeha ta importante, e informacion ta importante, y e datonan cu Eco Living ta bay yuda nos haya”, el a señala.
