Conseho di Santa Rosa
ORANJESTAD (AAN): Tur hende ultimo dianan por sinti e calor y e sed cu esaki ta trece cu ne. Riba Dialuna mes temperatura maximo na Aruba tabata di 33º Celsius, y marduga el a baha solamente te na 28º Celsius.
Pesey mes, segun Santa Rosa, ta importante pa tur criado di bestia na Aruba asegura cu tur boso e animalnan tin un cura cu tin un area fresco y hopi awa limpi pa nan bebe. Ta importante pa nan controla si e bestianan por ta deshidrata y e problema nan cu por bin pa falta di suficiente awa pa nan bebe.
Corda bon, ora cu animalnan ta perde mucho mas liquido cu nan por bebe (debi na calor, diarea, infeccion, of transporte largo), nan por cay rapidamente den un situacion grave y keda hopi deshidrata.
Con bo por detecta si un animal ta deshidrata? Tin algun test rapido cu bo por haci.
Kinipi nan cuero: Na un forma suave, kinipi e cuero los cu tin na nan nek of schouder. Un animal cu ta bon hidrata, e cuero ta bay bek flat mesora. Si e cuero keda dobla of ta bira flat hopi poco-poco, esey ta un señal di advertencia.
Check nan carni djente: Si nan carni djente ta roos y basta muha, esey kiermeen cu nan ta saludabel y bon hidrata. Pero si nan ta seco y tin color mas dof, esey nifica cu bo tin di cuminza duna nan awa mas rapido posibel.
Nan wowo ta mas aden: Si e wowo ta mustra hopi dof of nan bola di wowo ta mas paden den e cashi di wowo, esaki ta un señal tambe cu e curpa di e animal no tin hopi liquido e momento ey. Tuma accion mesora.
Debilidad of collapse: Si acaso bo animal chikito of carne, diripiente ta mustra di ta hopi debil, y nan ta collapse tambe, esaki ta un señal cu nan ta sufriendo di deshidratacion severo. Tuma accion inmediatamente aki.
Orina of fecal ta menos: E curpa ta seco ta pone cu e cantidad di orina ta poco, y material fecal (’sushi’) no ta mes hopi cu normal. Esaki a algo tambe cu por yudabo tuma na consideracion cu algo serio ta pasando cu bo animal.
Corda bon cu deshidratacion ta reduci fluho di sanger, ta daña e organonan di animal, y por hasta escala pa morto si acaso bo keda ignora e señalnan aki.
Percura pa bo duna nan awa limpi cada biaha. Si ta necesario, duna nan ‘Oral Rehydration Salts’ (ORS) tambe. Den casonan severo, Veterinario tin di pone hangua pa asina manda liquido direct pa nan sanger. Pues no warda te ora cu e señalnan aki a empeora.
