ORANJESTAD (AAN): Diadomingo atardi, algo prome cu 6 or, alarma a wordo bati pa un avion cu a confronta un emergencia. Esaki a pone cu e avion mester a baha bek na Aruba.
A pone henter e team di calamidad cla pa atende cu e situacion. Akinan Brandweer, Polis, Ambulans, entre otro a para cla pa atende cu e avion di jetBlue cu segun indicacion a sali for di Aruba cu destino New York, cu e mal suerte c'un pahra a dal den un di e motornan y esaki a pone cu a bati alarma y baha bek.
Mientrastanto, riba tera autoridad a percura pa cera e caminda dilanti di aeropuerto como tambe personal di aeropuerto tabata pendiente pa cualkier situacion di calamidad cu por a presenta ora di e aterizahe.
Un rato despues, e avion cu mas di 150 pasahero a baha na aeropuerto sin ningun problema. Tanto e tripulacion como e pasaheronan tabata sano y salbo.
