Reportahe special di DIARIO ta presenta contesta riba pregunta ainda habri - *Refineria di Aruba mester a duna prueba cu Citgo no a cumpli cu Aruba - *Gobierno Eman a acepta cu medida di Merca contra Maduro ta “forsa mayor”
ORANJESTAD(AAN)—Na 2018 tabata DIARIO cu a informa Aruba cu e acuerdo di Citgo lo no a bira realidad a base di tur e problemanan cu a presenta.
Tabata Prome Ministro Wever-Croes cu mester a dirigi e negociacionnan di salida di Citgo, cu tabata tin e refineria di Aruba rehen. Tin cierto preguntanan cu a keda habri, pero awe ta haya un contesta.
Primeramente mester aclarea cu e garantia di $150 Miyon, NO ta un suma cu PDV Holding (PDVH), e compania madre di Citgo, mester paga Pais Aruba si tin un breach.
E no ta un debe cu PDVH tin cu País Aruba. E ta un obligacion pa cubri incumplimiento di Citgo Aruba (CITGO) bou di cierto condicionnan.
PDVH, cu ta compania madre di CITGO, a duna un garantia pa cubri incumplimiento di contractnan dor di CITGO te na un maximo di $150 Miyon.
Pa Refineria di Aruba, RDA, por acudi na PDVH pa cobra cualkier incumplimiento, RDA mester por demostra cu CITGO no a
cumpli. Den e caso aki, unda cu CITGO a stop di paga huur, ta parce obvio cu CITGO a viola e contractnan dor di no paga huur. Pero lamentablemente e no ta asina simpel.
Prome cu establece cu tin un incumplimiento, RDA mester sigui e proceso di resolve conflicto manera ta describi den e Umbrella
Dispute Settlement Agreement.
GOBIERNO EMAN
A STROBA ARUBA
DI POR ACTUA BON
CONTRA MADURO
Na 2016, Gobierno Mike Eman a bay di acuerdo cu e proceso aki, cual ta uno largo y costoso.
Si RDA sali exitoso di e proceso ey, y CITGO nenga di paga, a penas e ora ey RDA lo por acudi cerca PDVH pa exigi pago di locual CITGO debe.
Desafortunadamente, e chance cu RDA lo gana su caso den un proceso di arbritahe ta minimo, pa motibo cu na 2016, gobierno Mike Eman a acepta cu sancionnan ta cualifica como un evento force majeure.
E consecuencia di esaki ta cu NO por tene e CITGO responsabel pa su incumplimiento. Esaki ta hustamente locual a sosode.
Na maart 2019, CITGO a informa tanto gobierno y RDA, cu nan no por cumpli cu nan obligacionnan
conforme e contractnan, pa motibo cu gobierno mericano a impone sancionnan contra Venezuela,
PDVSA y entidadnan liga cu PDVSA. (PDVSA ta 100% doño di CITGO.)
Asina cu CITGO a notifica RDA cu nan no por cumpli cu nan obligacion di pago, RDA a cuminsa cana e
proceso di resolve conflicto manera prescribi den e contractnan.
Na mes momento CITGO a pidi RDA pa negocia un suspension di e acuerdonan. Suspension di acuerdonan ta nifica cu RDA mester a carga TUR e gastonan di mantencion y preservacion di refinería y terminal, SIN cu RDA por opera e terminal pa
genera fondonan pa cubri e gastonan.
CITGO NO A
HACI NINGUN
TRABOU DI
MANTENCION
Tambe a bira claro pa RDA cu, en bista cu Citgo NO a haci ningun trabou di mantencion, tampoco a inicia cu e refurbishment, y mirando e condicion deplorabel di e facilidadnan di refinería y terminal, si sigui e proceso di arbitrahe, na final NO lo resta nada di e
facilidadnan.
Pa loke ta trata desmantelacion e acuerdonan ta stipula cu
- a) si CITGO NO cumpli cu su obligacionnan, y
- b) si después di sigui e proceso di resolve conflicto, y
- c) RDA haya razon den proceso aki,
CITGO lo mester paga pa e costo di desmantelacion. RDA lo mester traspasa TUR e facilidadnan di e
refinería y terminal pa CITGO y CITGO lo deshaci di esaki.
Di acuerdo cu estudionan haci recien riba costo di desmantelacion, ta sali na cla cu e costo di desmantelacion no ta halto.
Experiencia recien ta demostra cu den hopi caso a pasa cu e benta di equiponan y metalnan di refineria a genera suficiente
fondo pa cubri henter costo di desmantelacion.
ACUERDO CU
CITGO TABATA
CONTRA ARUBA
Di acuerdo cu e contractnan di 2016, tin 2 scenario pa desmantelacion:
Scenario 1 (NO tin breach):
Den scenario 1 ta sali di punto di bista cu NO tin breach y a cumpli cu e contractnan.
Na final di e periodo di contractnan, País Aruba tin 12 luna pa informa CITGO si ta desea di desmantela of no. Si NO ta desea di desmantela, CITGO NO tin cu paga nada.
Si País Aruba dicidi cu kier desmantela, CITGO y RDA conhuntamente mester paga pa e costo di
desmantelacion.
Scenario 2 (SI tin breach cual ta e situacion actual):
Den scenario aki ta sali di punto di bista cu CITGO NO a cumpli cu su obligacionnan.
Na momento cu CITGO NO cumpli cu su obligacionnan, RDA mester notifica CITGO di su incumplimiento.
CITGO tin 30 dia pa presenta un plan pa “cura” su incomplimiento (curing period). Si CITGO NO presenta
e plan, RDA mester cuminsa cu e proceso di resolve e conflicto di acuerdo cu e proceso defini den e
Umbrella Dispute Settlement Agreement.
Si RDA haya razón den e proceso aki, CITGO mester “cura” e incumplimiento. Si CITGO no “cura” esaki, e ora RDA por notifica CITGO di e intencion pa termina e acuerdonan pa motibo di incumplimiento. Pero por manda notificación pa CITGO solamente si e proceso di resolve conflicto a termina.
Den e scenario aki:
- a) unda cu RDA notifica CITGO cu e no a cumpli, y
- b) RDA haya razón den e proceso pa resolve conflicto cu CITGO no a cumpli, y
- c) País Aruba ta desea di desmantela e refinería y terminal,
Solamente den e caso aki, CITGO mester para responsabel pa e costo di desmantelacion.
GOBIERNO
MIKE EMAN
A ENTREGA
DERECHO PA
ARUBA ACTUA
- Pa motibo cu, na 2016, gobierno a acepta cu sancionnan ta califica como un evento force majeure,
- Consecuentemente RDA no por obliga CITGO cumpli cu su obligacionnan pa motibo di force
majeure, e chens ta minimo cu RDA lo haya razon den e proceso di resolve conflicto (arbitrahe), pa motibo cu
RDA NO por tene CITGO responsabel pa su incumplimiento, esaki conforme e acuerdonan firma na 2016
y clausula di force majeure. Pues teniendo na cuenta e situacion actual, NI si Pais Aruba pidi pa desmantela, e chance ta chikito cu Pais Aruba por obliga CITGO desmantela awor. Mester añadi cu PaisAruba NO ta desea di desmantela.
Ademas RDA NO por lanta un caso pa daño di perhuicio contra CITGO pa motibo cu,
na 2016, gobierno a entrega e derecho di RDA y Pais Aruba pa lanta caso contra CITGO.
RESULTADO
DI CONTRATO
PA SALIDA
DI VALERO
Pa locual ta trata daño ambiental, na 2016 gobierno di es tempo ey a exonera Valero, Coastal, Wickland Oil y Lago pa tur daño ambiental causa dor di nan operación di e refineria y terminal.
Esaki di acuerdo cu e Transfer y Master Settlement Agreement entre Pais Aruba y Valero na 2016.
Tambe na 2016, gobierno es tempo ey a exonera CITGO di tur daño ambiental cu ta existi prome cu CITGO a establece na Aruba.
Y en bista cu CITGO no a cuminsa ni cu e refurbishnent project y tampoco a opera e refineria, por bisa cu e daño causa pa CITGO mes ta minimo.
Pues e daño ambiental grandi a ser ocasiona den pasado y lamentablemente net esaki a keda keda exonera.
Locual poco hende ta menciona ta e garantia cu Pais Aruba a duna na 2016.
Conforme articulo 12.3 di e Definitive Participation Agreement (DPA), gobierno anterior a acorda pa
duna CITGO un garantia di MINIMO $300MM. Pa Pais Aruba por cobra algo di e garantia di PDVH, Pais
Aruba ta mara na yen condicionnan y un clausula force majeure cu ta beneficia CITGO. A demas Pais
Aruba mester cana un caminda largo y costoso di arbitrahe na New York pa eynan dicidi si Aruba ta haya
razon.
Pero si Pais Aruba mester faya (breach) den su obligacionnan, CITGO por cobra e MINIMO di $300MM
SIN tin bai arbitrahe na New York. Pa Pais Aruba e ta prácticamente imposibel pa claim contra e garantia
di PDVH, mientras sin mucho obstaculo, CITGO por a cobra un minimo di $300MM di Pais Aruba sin cu
CITGO a inverti.
DIARIO den su proximo edicionnan lo sigui elabora riba e final real di CITGO for di Aruba cu ta cera conoci cu e berdad cu for di 2018 DIARIO a presenta.
