Gobernacion den Siglo 2021 sigur mester tabata base pa debate economia - *Mike Eman a kibra Aruba financieramente pa crea fracasonan economico - *Evelyn Wever-Croes a tuma medida pa Aruba por sobrebibi caida total economia
ORANJESTAD(AAN)—Pakico den e debate mester a pone Mike Eman y Evelyn Wever-Croes enfrente di otro? Pasobra ambos a bira gobernante di Aruba den temponan dificil, uno mas cu otro, y pasobra e maneho di Mike Eman a bira base pa e maneho di Evelyn Wever-Croes for di 2017.
Pa por a prepara pa e debate cu e ingredientenan mas importante cu Pueblo di Aruba tabata spera, e moderador di e debate, mester a biaha den tempo y bolbe na entrada di Siglo 2021 cu a mira mundo den un recesion enorme.
Un recesion, caida economico mundial, cu a afecta Aruba tambe y a haci necesario pa e pais a tuma medida cu Prome Ministro Nelson Oduber a mira den entre otro reforma belasting, manera por cierto na hopi pais a sosode y ta sosode.
E sistema “tradicional” di belasting cu Aruba semper a conoce, a wordo cambia pa introduci e sistema cu a causa adaptacion di e belastingnan tradicional cu a conoce hasta cierto alivio y pa introduci BBO.
E forma cu BBO ta escala cu cada transaccion, a haci cu mayoria di hende na Aruba, tabata prefera un Sales Tax.
BBO a bira e loke Mike Eman a uza pa lansa su mes como number uno di e partido AVP NA 2009. El a priminti cu e ta deshaci di BBO pasobra BBO lo a stroba economia di Aruba, cu lo a conoce mucho mas produccion segun Mike Eman, cu no a haci un estudio profundo di loke e tabata predica.
Ora Mike a gana eleccion na 2009, su prome paso tabata pa baha BBO pero Raad van Advies a mustra Mike cu esaki lo a resulta den un debe di casi 100 Miyon pa Aruba mientras cu no tabata tin ningun prueba (ni den loke Mike mes a basa su mes ariba) cu baha BBO lo a trece crecemento comercial.
Na e momento Aruba tabata conoce problema financiero grandi tambe cu salida di Valero cu tambe a baha entrada di Aruba.
Mike a baha BBO cu mita, a causa e problema financiero di Aruba, pero na 2010 mester a admiti personalmente cu no por deshaci di e resto di BBO pasobra manera Raad van Advies a pronostica, baha BBO no a aporta na mas actividad economico mientras Aruba si a conoce inicio di su desaster financiero.
Na 2013 e maneho di Mike Eman ya a produci problema serio pa e pais pero Pueblo di Aruba no tabata na haltura y a wordo confronta solamente cu otro plan di Mike Eman, cu no a busca inversionista pa hinca placa den Aruba pero a uza placa di Aruba pa crea proyectonan cu un balor di 1.6 Miljard.
Esaki tabata otro forma cu Mike Eman kier a boost economia segun su palabranan creando proyectonan cu no a wordo bon administra y a costa mucho mas cu loke a wordo planea y cu pueblo mester paga sigur te na 2040.
Hulanda a rechasa e maneho di Mike Eman cu a bay busca Citgo como proyecto economico sin tene na consideracion e peligernan grandi na cual el a mara Aruba debi na e problemanan serio cu Citgo tabata enfrenta y e hecho cu Citgo te awe cualkier momento por pasa pa otro propietario.
Evelyn Wever-Croes a hereda Aruba den e situacion cu Mike Eman a laga atras. Pa por a start economia di Aruba na un forma diverisifica, e mester a deshaci di e contracto entre Aruba y Citgo, cu for di 2017 a tranca.
Aruba a keda depende solamente di turismo, cu semper DIARIO a yama sumamente fragil, y cu a basha abou ora Covid-19 a bati na porta.]
Prome cu e pandemia ya Evelyn Wever-Croes mester a cuminsa traha riba un base economico nobo cu tabata encera baha gasto pa inversionistanan y tambe crea un sistema mas facil pa inversionistanan por a drenta (elimina e red tape di aparato gubernamental).
Pa Aruba por a sobrevivi na 2018, Evelyn Wever-Croes mester a tuma medida financiero, yega na palabracionnan cu Reino, y crea un base economico fortifica, basa riba diversificacion.
Empresanan mas chikito a haya sosten di Evelyn Wever-Croes cu den tempo di pandemia Covid-19 mester a percura pa economia sigui produci e circulacion di placa cu e pais tabata tin mester pa su economia interno.
Ta entre otro e asistencia financiero na pueblo, cu por a sigui haci gasto, y ayudo directo na companianan, cu economia di Aruba a sobrevivi e pandemia mientras awe e pais ta en espera di dos proyecto importante cu ta Eagle LNG, cu mester baha e peso di awa pa Pueblo y empresanan y e refineria di Quanten.
Awe Aruba ta bolbe saluda un barco di turista na entrada di un normal nobo despues di e ultimo ola di Covid-19.
E debate economico entre Mike Eman y Evelyn Wever-Croes sigur lo a duna prueba di e diferencia den gobernacion di e pais durante dos gobernacion.
