Comentarionan ta mustra cu kizas Aruba tin di trece nan bek
ORANJESTAD (AAN): Den fin di siman, DIARIO a haya e pregunta pakico na Aruba no a pone bek mas e “Toren di Salbabida” cu antes tabatin na diferente beach riba e isla. Nan a trece esaki dilanti, basa riba e recien tragedia riba lama unda un dama hoben di 13 aña di edad a perde su bida, ora cu el a cay den awa durante ‘Tubing’, y e mesun speedboat a bira bay bek pa busk’e, pero a pasa riba dje y lage mortalmente herida.
Nan ta indica cu antes tanto e.o. Eagle Beach como tambe Palm Beach tabatin e Torennan aki cu Lifeguards aden cu kizas lo por a cuminza duna CPR y notifica Paramediconan aun mas rapidamente si acaso el a mira algo pasa riba lama.
Profesionalnan cu ta eherce e funcion di Salbabida (“Lifeguards”), ta hunga un rol principal pa sigura cu tin un ambiente safe pa landadornan na beachnan publico, of na un piscina.
En general, e personanan aki ta landadornan avanza cu a ricibi training via e.o. Cruz Cora of otro instancia den landamento.
E rol principal di un Lifeguard ta pa vigila loke ta pasando riba lama. Pa haci esaki mihor, nan ta sinta riba cabinanan special hisa hopi halto, pa asina nan por mira mucho mas leu y un area mas hancho. Si acaso un hende ta den peligro of ta haciendo algo peligroso, e Lifeguard tin un fluit of hasta un alarma pa alerta esnan envolvi. E por adverti tambe esnan cu ta stuur boto, ora cu esakinan viola e zonanan di landamento cu tin poni na varios beach di Aruba.
Den peor casonan, Lifeguardnan ta alerta su coleganan y tambe personal di Rescate, ora cu un hende ta seriamente herida, of ta bay bao awa.
Lifeguardnan ta haya training tambe ora di duna rescate y demas caso di emergencia, incluyendo CPR. Ora cu un landado confronta cansancio riba lama, ta haya kramp di pia, a wordo herida, of ta den riesgo pa cualkier otro motibo, e ta core baha di su toren, y drenta lama cu un boei mara na su curpa y ta bay yuda pa trece e landado bek na tera. Si acaso e landado tabata bao awa y ta fo’i tino, normalmente e ta duna yudanza eynan mes, mientras ta warda Paramediconan yega.
Den pasado tabatin Lifeguard constant den e Torennan aki. Pero despues di tempo tabata usa nan solamente ora di Semana Santa, cu personal di Cruz Cora sinta na halto ta vigila. Pero debi cu nan a bira insigur, a dicidi na kita nan.
Y nunca mas no a pone nan bek.
Pa duna un bon bista rond mundo, kizas ta bon idea pa Aruba y demas instancianan turistico pensa con pa introduci nan bek, specificamente na areanan unda tin hopi hende ta landa tur dia. Y tambe lo ta bon idea pa inclui un presupuesto pa pone un Lifeguard den e Torennan aki, durante oranan di dia y prepara un salario pe. Riba e potret aki por mira un di e Torennan cu tabatin antes na Eagle Beach.
E lo ta un extra toque cu por yuda pone turistanan sinti nan aun mas safe.
Si acaso e “Torennan” aki ta mahos, kizas lo por adapta y usa esnan ‘mas abao’ cu tin instala na otro paisnan, manera na Miami Beach na Florida, Merca.
