ORANJESTAD (AAN): Bo a check prijs di azeta dushi ultimo temponan?
Bo a wak con algun galiña frozen awor costa como 6 Florin mas caro compara cu luna di Februari? Bo a check prijs di cereal, prijs di cierto noot, y con tin cierto producto cu no ta ni aparece mas riba reki na Supermarket?
E indice publica Diabierna door di FAO (Food and Agriculture Organization di Nacionnan Uni), cu ta basa riba e variacion mensual na mundo di e prijsnan di un canasta di productonan basico, a registra un aumento di 12,6 porciento den luna di Maart (compara cu Februari), ora cu ya caba esey a bati un record desde cu nan a crea e estadisticanan aki.
Na Aruba ta wardando anciosamente pa haya sa kico lo pasa cu prijs di Gasolin y Diesel riba Diaranson 13 di April venidero. E lo subi sky-high manera cu a pasa na otro islanan den Caribe, of Gobierno lo bay absorba cierto porcentahe di accijns, y asina mantene e prijs igual cu luna di Maart, of djis lage subi un tiki so.
Segun Organizacion FAO, prijs di cereal a subi cu 17,1 porciento compara cu Februari, debi na e hecho cu trigo y otro cerealnan secundario, ta subi di prijs debi na e guera na Ucrania.
Prijs di cuminda tambe a subi debi na azeta dushi, cu a subi cu 23,2 porciento den un luna, y esaki a wordo impusa principalmente debi na azeta di girasol (‘sunflower oil’), di cual e prome exportador mundial ta Ucrania.
Prijs di Palm Oil, Soybean Oil, y Rapeseed Oil tambe a subi, debi na ausencia di Sunflower Oil den Supermarketnan.
