PARAMARIBO: Un muher di 35 aña di edad na Suriname, a keda deteni recientemente, y despues cu el a ser presenta dilanti Fiscal Auxiliar, el a keda encarcela tambe.
Polis a bisa cu e muher Dionne W. a nota cu diripiente un suma grandi di placa a aparece riba su cuenta di banco. Parce cu un trahador di banco a comete un eror administrativo, y e placa a aparece riba e cuenta di e muher. Ora cu el a ripara esey, e muher a bay saca tur e placa!
E suma ta riba di 300.000 Dollar Surinameño (como 25 mil Florin Arubano), y mas bien tabata destina pa cuenta di un Fondo di Districto. Despues cu e muher a descubri cu e suma a aparece riba su cuenta di banco, el a bay saca tur cos di ATM Machine.
Ora cu e banco a ripara cu nan a comete e pifia, nan a bay busca pa tuma e placa bek, pero esaki ya a desaparece.
Asina e banco a haci denuncia, y autoridad a cuminza busca Dionne y a detene. Awor ta bay investiga pa haya sa kico e muher a haci cu e placa.
