Director di DOW, Marlon Croes: - *E meta di desaroyo ta pa haci Oranjestad mas vibrante
ORANJESTAD (AAN): Director di DOW, Marlon Croes a duna un splicacion riba unda ta para na e momentonan aki pa loke ta e desaroyo di Oranjestad.
El a splica cu pa loke ta circulacion, esaki ta practicamente cla den un 90 porciento. Infrastructura di Oranjestad den Caya Grandi mester ta 100 porciento cla. E cayanan na banda ta 25 porciento cla.
Tin cu bay wak e interupcion di e tram. E tram aworaki ta para y tin cu bay evalua conhuntamente cu sector priva kico ta bay haci cu ne y con ta bay capitalisa ariba e infrastructura cu a wordo poni caba, Croes a indica.
Banda di esaki tin cu bay wak riba e embeyecimento di Welcome Plaza, Plaza Daniel Leo, fontein di Penha y esun di Nicky Habibi.
Welcome Plaza ta 'pick up' cu su kiosconan y tin cu bay wak e parti delicado cu tin cu stimula. Ta wak Plaza Daniel Leo cu ta mustra di ta un exito cu diferente actividadnan cu ta tuma lugar di F&B y esey ta duna bida rond di e plaza aki, e director di DOW a señala.
Tin e kiosco banda di Penha cu no a duna resultado y tin cu bay wak kico ta e formula pa hacie mihor. Mescos cu e fontein na Plaza Nicky Habibe, a agrega.
Marlon Croes a sigui bisa cu e sinergia y e complemento entre sector publico y sector priva ta hopi importante pa por realisa esaki.
Gobierno ta dispuesto pa inverti e presupuesto limita cu tin y crea e posibilidadnan pa cultiva e area pa sector priva por capitalisa riba dje.
Vivienda ta un parti hopi importante pa trece den caya. Universidad di Aruba ta bay atrae hopi studiante di afo y mester mas vivienda den Caya. Na ex edificio di Nicky Habibe ta preparando pa un desaroyador bin cu un edificio bunita eynan. Ta den proceso cu un grupo di desaroyador tambe pa haci uzo di Douane Kantoor.
E edificio aki di Douane Kantoor, segun e ultimo taxatie rapport, su balor ta bayendo atras y aworaki ta haya un candidato potencial pa converti esaki den un compleho di apartamentonan, similar na e proyecto Caribbean Town, cual a wordo lansa dos siman pasa.
Tur esaki ta haci Oranjestad mas vibrante, a remarca.
