Prijs di petroleo ta keda riba 100 Dollar na un mundo turbulento --- *E resultadonan di un mundo mas pober ta dicidi pa 2023 --- *Menaza persistente di Covid-19 y un economia rehen di guera
ORANJESTAD(AAN)- Aparentemente hende kier lubida e realidad actual di mundo. Ora sigui e pronosticonan cu a yena mundo durante e prome lunanan di 2022, por a mira a nota cu actualmente ya mundo mester a cuminsa conoce recuperacion, salida di su problemanan principal pa asina por a logra alcansa un 2023 di recuperacion.
Ya na e momentonan aki, sinembargo, por nota cu e instancianan cu mundialmente a crea speranza den cambio positivo importante na 2023, ta cuminsa duna informacion cu ta crea mas motibo pa preocupacion di loke futuro por trece.
Central den e preocupacionnan mundial ta nota e menaza cu forsa di compra por sigui cay den desaroyonan cu ta aporta na problema financiero, economico y asina social.
Mientras e industria di arma sin duda ta florece den e encuentronan arma na Ukraine, hende a cuminsa perde interes pa loke lo afecta e desaroyonan mundial mas importante na caminda pa 2023 y pa futuro.
E situacion na Ukraine ta determinante pa bienestar di mundo, cu cada rato ta tuma nota di mas resultado cu e guera tin pa mundo, cu ta confronta e problema di un aumento drastico di pobreza.
Avance mundial di pobreza ta nifica cu cada bez un grupo creciente tin mas problema pa paga pa costo di nan bida. Nan tin menos placa pa gasta, loke ta afecta comercio, cu ta e motor di actividadnan cu ta produci placa, cu mester circula den un parti mas grandi posibel di comunidad.
Na e momentonan aki mester papia di placa. Mester papia di e produccion di comercio local y internacional, cu ta genera fondonan pa e parti social di comunidad.
Sin comercio no tin trabao, no tin entrada, no tin pan riba mesa na paisnan yama capitalista pero tampoco na paisnan comunista, cu tambe ta depende di placa.
Durante e prome parti di 2022 continuamente proyeccionnan sumamente alentador y prometedor tabata worde lansa pa 2023.
Segun mundo a planea, Covid-19 mundo a supera Covid-19 na 2023. Mundo a conoce recuperacion.
Awe cifranan y realidad ta papia otro idioma.
Covid-19 por conoce un ola nobo cu ya a cuminsa afecta diferente pais. Un ola nobo lo nifica pa tur pais cu lo tin mas gasto, lo tin peligro atrobe pa produccion y pa economia mundial.
Na Aruba e cifranan di Covid-19 ta mustra claramente con e malesa ta sigui exigi bida, pero tambe ta sigui plama.
E experencia aki ta worde comparti cu cantidad di pais preocupa pa loke Covid-19 lo nifica na gasto, na falta di personal, na produccion pero tambe pa bida humano y personanan cu ta keda cu un problema fisico permanente.
Na Europa ya paisnan a cuminsa prepara pa un ola nobo cu su resultadonan mientras e guera na Ukraine ta un turbulencia mundial grandi.
E prijs di petroleo ta duna prueba di e realidad y ta keda riba 100 Dollar pa asina sigui influencia prijsnan rond mundo, incluso Aruba.
E tono di hubilo cu 2023 lo trece cambio grandi a cuminsa cambia rond mundo, cu pa un parti grandi kier hinca su cabes den santo pa no mira e realidad di economia mundial, cu ta dicidi pa entrada y bienestar di pais y hende.
Mientrastanto e progreso nobo di Covid-19 sigur ta worde vigila mundialmente. Medidanan cu a worde elimina, mester regresa? Preguntanan cu mester worde contesta na un mundo, cu aparentemente no kier mas preocupacion den un mundo productor di mas problema na momento cu segun hende, problema mester tabata tras di lomba.
