Screening di politiconan den funcion sumamente importante pa votadornan - *Pa Aruba recobra su autonomia mester destrui e spirito di corupcion - *Rapport Refineria y caso Bombero ta ilustra e cambio cu Pueblo ta exigi
ORANJESTAD(AAN)—“E spirito di corupcion ta e menasa mas grandi pa un pais. Democracia ta wordo viola. Reglanan di e Estado di Derecho ta wordo kibra. Pueblo ta bira victima ora politiconan ta mira nan interes y deshonestidad finalmente destrui balornan pero tambe imagen di e pais.”
Mientras formacion di un Gobierno nobo pa Aruba ta transcuri na un forma nobo y cu apertura publico, DIARIO ta sigui atende e prioridadnan cu ta biba den e publico na Aruba.
E interes mas grandi di Pueblo na e momentonan aki ta concentra riba e integridad di funcionarionan den posicion publico.
Despues di e ola di casonan di corupcion y accionnan dudoso den gobernacion, dos desaroyo importante cerca publico ademas di casonan cu ya tabata den desaroyo.
Un caso cu awor ta cerca Hues atrobe ta e caso di e halto funcionario di Cuerpo di Bombero di Aruba. De Cuba a wordo suspendi di su trabou na Cuerpo di Bombero a base di investigacionnan serio contra su persona.
Siman pasa e caso a bolbe Huez despues cu De Cuba a pidi Husticia pa deshaci di e hecho cu el a wordo suspende dor di Ministro Andin Bikker pa motibo di acusacionnan actual manera hasta benta di propiedad di Pueblo na e Cuerpo di Bombero.
Un caso cu tin hopi atencion di Pueblo ta e informacionnan rond di e rapport Refineria di Aruba, cu manera ta wordo splica na DIARIO, ta duna mustra con e grupo cu tabata cu Gobierno Mike Eman, a wordo favorece contra tur regla den e compania di Pueblo di Aruba.
“Mester pone un fin na e spirito di corupcion cu Aruba a conoce den su historia como pais,” ta e opinion di informantenan cu pa Aruba recobra su autonomia, gobernantenan pero tambe henter e aparato gubernamental y Parlamento, mester tin un imagen limpi enfrente Pueblo y mundo.
E screening di personanan cu un funcion publico ta sumamente importante mientras mester introduci leynan cu ta castiga gobernantenan y funcionarionan publico cu ta practica corupcion of ta kibra regla di leynan con ta atende cu placa di Pueblo.
“Pueblo mester tin confiansa den su gobernacion,” ta e opinion general di Arubiano.
E cambio den e formacion di Gobierno, manera hopi a trece dilanti, ta crea e speransa cu Aruba ta drenta un epoca di recuperacion total den e moral di Aruba mester wordo respeta.
Ta wordo acentua cu e prome accion di Parlamento mester ta sigura integridad, decencia, den gobernacion y e aparato gubernamental cu mester sigura bienestar di Aruba.
