Jesseline Kelly, Relacionista Publico ta splica:
ORANJESTAD (AAN) — Na cuminzamento di e aña aki, Departamento di Asunto Social a inicia un seccion riba nan pagina di Facebook, yama: “Ley di Bijstand”.
Den entrevista cu Jesseline Kelly, Relacionista Publico di DAS, el a informa cu e meta di esaki ta pa tur luna nan traha un articulo for di e Ley di Bijstand.
E secuencia con nan ta trata e articulonan ta a base di e demanda y ki retonan e seccion di bijstand ta confronta cune, pa asina nan por educa y informa e pueblo, specialmente e clientenan di bijstand, kico nan tin cu haci, na kico nan tin derecho, ki rekisitonan mester cumpli cune, y con e proceso ta cana.
Den luna di Maart nan a trata e articulo 3, titula: “E apoderacion di e Ley di Bijstand”. Jesseline Kelly a señala cu ora e trata un articulo e ta cuminza completamente for di e base y e ta pone su mes den e zapato di e cliente, y ta haci manera e no sa nada ni kico ta apoderacion. E ta cuminza na splica e cosnan chikito.
“Apoderacion ta ora cu un cliente, pa un motibo valido ta apodera un otro persona pa cobra su bijstand p’e. Esaki no ta bay sin mas. E tin su procedure y su rekisitonan, y no pa cualkier motibo. Tin cinco motibo valido cu bo por duna bijstand y nos departamento, un apoderado pa haci esaki pa bo. E motibo mas comun cu ta bin dilanti ta ora cu e cliente ta bay cu vacacion den exterior. Esaki tin un tempo maximo di cuater siman”, Jesseline Kelly a splica.
Kico e cliente aki mester haci?
E mester acudi na e seccion di Bijstand, na San Nicolas, hunto cu e persona cu e kier apodera. Ambos mester presenta un ID valido, y mester trece un copia di e ticket di vuelo, unda e ta bisa ki caminda e ta bay y ki fecha e ta bin bek. E tin cu presenta su passport, y hopi importante ta cu e persona cu e cliente ta apodera mester bin cu un prueba di su persons number. “E mester ta un documento oficial na unda cu e por mustra su persons number”, Jesseline a reitera.
El a agrega cu for di aña pasa na Februari, ora cu DAS a lanza e locket social, nan a pone hopi enfasis riba persons number, y esaki ta pa facilita e seccion di bijstand na momento, y si mester duna sancion e tin cu cana segun e persons number.
“E ora nos no mester core yama Departamento di Impuesto, core busca, ban pidi. Ya nos tine caba den nos sistema loke ta hopi importante, y nos ta pone enfasis riba esey”, Jesseline Kelly a señala.
Otro caso unda e cliente por apodera un hende pa cobra su bijstand ta si e ta bayendo afo pa salud, door di AZV. Den e caso aki e tin cu presenta copia di e carta di AZV, trece e persons number di e apoderado, y asina aki e ta cuminza cu e proceso.
