Segun Edward Maduro, vocero Bloke Sindical:
ORANJESTAD (AAN) – Siguiendo cu e conferencia di prensa di Bloke Sindical, unda Edward Maduro a referi na e carta di Minister Presidente di dia 20 di Maart aki, el a bisa cu e mandatario ta bisa cu nan a tene cuenta cu e conseho di Raad van Advies, y cu nan no ta haya cu e tin peso pa bin cu aanpasing den e ley. Tambe ta sugeri cu e sindicatonan no a bin cu nan puntonan.
Maduro ta refuta esaki y a menciona cu sindicatonan na mas di un ocasion a bin cu varios punto skirbi, unda nan ta bisa cu tin hopi cos cu no ta cuadra den un prestatie management, manera gobierno lo kier bin cune. El a acentua cu e sindicatonan tin cu djis scucha kico gobierno ta papia, pasobra di nan banda nan tin hopi experiencia amarga cu ta bisa un cos pero tras di linea ta bisa otro. Vooral sindicato SADA sa cu gobierno ta bisa un cos y ta haci otro.
Maduro a señala cu no tin siguranza cu si e sindicatonan ta participa den e Comision Tecnico di cuater pa seis siman lo ta bin cambionan. Esey no ta e automatismo di e comision.
Riba otro punto cu e mandatario a menciona den e carta di dia 20 di Maart, Edward Maduro a remarca cu desde final di 2021, e sindicatonan ta na mesa cu gobierno, representa pa DRH, cu tabata e voortrekker di e “Landsbesluit Prestatie beoordelling overheidspersoneel”.
Edward Maduro ta remarca cu si di 2021 y full 2022 nan ta sinta na mesa cu gobierno, y ningun di nan puntonan no a wordo teni na cuenta, con por ta cu den 4 pa 6 siman lo bay tene cuenta cu puntonan cu lo bin den e Comision. El a señala cu prome cu e ley di prestatie management a wordo firma, dia 21 di December 2022, gobierno no a tene cuenta cu e sindicatonan. “Eynan bo ta wak cu gobierno, Minister Presidente no ta sincero ni cu e ambtenaar, ni cu e trahado, ni cu pueblo. Pasobra un bez cu bo ta bay un conferencia di prensa, bo mester ta sincero cu tur hende cu ta scuchando bo”, e lider sindical a subraya. El a cuestiona cu e mandatario a bisa cu e sindicatonan ta papia hopi pero no ta pone nada riba papel. Maduro a bisa cu dia 6 di December 2022, nan a manda un carta pa gobierno den cual nan ta bisa cu e tema ta pa postpone e implementacion di e ley di prestatie management. Tambe den e carta nan ta menciona nuebe punto di preocupacion unda nan ta splica gobierno pakico mester hala atras e fecha di implementacion, pasobra e momento ey ainda e ley no a pasa, y e mester a bin na vigor 1 di Januari 2023. Di e carta aki e sindicatonan no a scucha nada di gobierno. Nan ta lamenta esaki pasobra DRH, den e reunionnan cu nan a sinta cu e sindicatonan, DRH a bisa nan cu tin un documento cu ta bay keda riba mesa, cu prome cu nan bay den e prestatie management, esaki por wordo cambia. Pero loke ta trata e ley ta bira vast, loke ta logico ora e wordo firma.
