E lucha cu ciudadano Lindo Lopez tabatin contra su malesa

Famianan relatando awor despues di su morto

ORANJESTAD (AAN): E conocido ciudadano Benedicto Tiolindo Lopez, mihor conoci como Lindo a fayece recien.  E ta tata di e conocido dama Minouche Lopez, y el a duna un relato awor di su ultimo etapa di bida.

   El a splica cu nan tata y welo Lindo no a bay for di e mundo aki sin hasi un impacto grandi na tur cu a conoce y pasa tempo cune. En especial despues cu nan mama y wela Yvonne a fayece 4 aña pasa na unda e tabata un reto pa ofrece e miho cuido posible na Huize Yvolin, sabiendo cu su malesa tabata progresivo. E ultimo añanan Lindo no por a papia ni cana mas pa via di su malesa. Y el a keda bay atrás te bira ful paralitico acompaña cu hopi dificultad pa guli.

   E tristesa mas grandi ta cu e tabata un preso den su mes un curpa.. cu un tino 100% bij. Asina mes Lindo semper tabata un persona alegre, cu animo pa biba, haci su ehercicio tur dia pa slow down e proceso y pa purba y ‘making the best out of it’, ni cuanto dificultad el a encontra. El a siña tur hende cu mester tin fe, disciplina y pa ta fuerte. Nos ta hopi agradecido na cada un cu a yuda nos durante e proceso aki, pasobra e no tabata un proceso facil.

   Un danki di curason ta bai na tur e 20 enfermera y ayudante cu a cuide cu hopi amor. En especial: Liz Blanquiceth, Miriam Mendez, Aura Moncada, Niyeret Urrego y Adriannis  Rodriguez cu tabata bishite hasta despues cu nan a cambia pa otro trabao, Zulay Dugarte,  Natacha Suffraint , Maria Green, Angela Zamora y Coleta Zschuschen.

   Na su mihor amigo Tony Tromp cu tabata bishite casi tur siman, na su primonan cu semper a bin bishite pa alegra su dia, na demas famia y amigonan cu tabata bishite regularmente, na Lions Club en especial Sr. Bibi Arends pa su pasenshi y ayudo incansabel pa drecha e cama electrico, na Sra. Windie Oude Avenhuis-van Loon y tur e instructornan di Aqua windies pa nan energia incansabel durante e aqua gym den pool cu hasta den su rolstoel e tabata disfruta di dje, na Wit Gele Kruis, na Ben y Jeanette Schoemaker, famia Guillermo Figaroa tempo cu Sr. Guillermo Figaroa q.e.p.d. tabata bibando na Huize Yvolin.

   Un danki na tur su dokternan cu semper tabata pendiente: Dr. Melanie Ho Kang you y Jenny Serrato, Dr. Roberto Weiser, Dr. Casper Lacle, Dr. Glenn van Trigt. Tambe nos kier a bisa danki na Milly Grullon pa semper entrega su favorito Herbalife na ora, na Tatichi Snack pa semper traha su pisca hasa manere e tabata gusta, na Tico Boekhoudt pa su pan dushi casi tur siman y na e Fysiotherapista Marlon Maduro pa dune su therapie na cas.

   Un danki di curason na Nathalys Wever-Garcia y Alison Perez y full e crew di  Cas di mi Chepa, cu a habri nan porta ora Hospice no tabata cla pa ricibi’e ainda, na e crew y voluntarionan di Hospice pa hasi su ultimo dianan placentero y en especial pa cumpli cu su ultimo deseo y juda nos den e momentonan dificil den su ultimo momento di bida y e oranan despues.  Na dominee Peter Hazenoot pa su sosten prome y durante e despedida.

   Tambe nos kier a bisa danki na Jowani Giraldo y Aura Moncada pa traha e bunita caha pa Lindo su ultimo lugar di sosiego, como gesto y den tempo hopi cortico; na Francis Tromp cu a toca Steelband como sorpresa dia cu Lindo a cumpli 84 aña y cu a toca keyboard hunto cu cantante Arleen Thiel durante  entiero como ultimo gesto na su querido “omo” Lindo.

   Last but not least un danki na tur esnan cu a manda krans, whatsapp , facebook message, carchi, telegram, y pa e yamadanan telefonico cu nos a ricibi, e personanan cu a manda un contribucion pa e Fundacion Quality Life Magda Lopez y na tur esnan cu a compañanos durante entiero. Boso muestra di atencion tabata y ta un gran sosten y consuelo pa nos.

   E pintura di e Trupial y e Blenchi, crea pa Minouche Lopez a wordo yama ‘The Reunion’.  Nan ta sinti cu su defunto casa Yvonne ta manda señal via trupialnan pafo di cas, y aki ta wardando cu felicidad riba yegada di su amor Lindo (Blenchi, e simbolo di PSP) pa yega y bula hunto den e luz pa eternidad.