Comentario: --- Skirbi pa Mercedes Monge
Manera ta conoci den varios pais ya caba a aproba e Ley di interupcion boluntario di embarazo, entre otro Argentina y awo Colombia, y na Europa e ta existi na Spaña caba.
Na Colombia e ley ta permiti interupcion di embarazo (kiermen aborto) te maximo e di seis luna di gestacion.
Tur esaki pa defende e derecho di hende muher di dicidi riba su curpa, y esaki tin un grupo grandi di hende muher contento y feliz, y otro grupo den total desacuerdo cu a tuma e ley aki cu hopi tristeza.
Ami, como un persona sumamente gradici cu Dios cu a permiti mi ta un mama, y como un ser humano cu hopi sentimento bunita pa mucha, di un banda no por ta absolutamente di acuerdo cu aborto, pero di otro banda si tin casonan unda un aborto terapeutico ta necesario.
Mi ta comparti cu nos lectornan, e caso di mi mama, cu na su 51 aña di edad a sali na estado, pero debi cu su curazon a crece durante su ultimo embarazo, drentando su di tres luna di gestacion, el a bira asina grave cu por poco a perde su bida, y na hospital, tanto e cardiologo como e ginecologo, a pidi mi tata autorizacion pa realiza aborto. Mientras nos a compronde cu tabata necesario, mi mama no por a lubida hamas, cu “nan a mata su yiu”, mientras su otro cinco yiu y nos tata a gradici Dios, cu mi mama a scapa.
Tambe mi ta kere cu den caso di violacion sexual, sea un muher adulto of e mayornan di un mucha muher menor di edad, por actua mesora si haci un “curettage” pa asina no core e riesgo di laga tempo pasa y resulta cu tin un embarazo no desea.
Sin animo di huzga, pasobra berdad cada ken ta doño di su decisionnan, mi no tin otro palabra cu “crimen” pa califica un aborto ora un criatura ya tin su forma y su curazon ta bati den e barica di su mama. Y menos den un estado avanza di seis luna. E casa di un sobrino di mi a haya sa na tempo cu su di dos yiu ta bin cu Down Syndrome; su ginecologo a puntre si e kier sigui su embarazo, y el a bise “claro cu si”! Y nan ta feliz cu nan precioso popchi.
Ami ta pensa cu hendenan muher cu ta activo sexualmente pero no kier haya yiu, mester evita sali na estado. Simple! Tin hopi metodo cu por uza, pa despues no deshaci di un ser cu nan a engendra den un relacion intimo conciente y pa boluntad propio. Den e caso aki e ponencia “ta mi curpa mi ta dicidi” ta un vil excuus pa comete un delito.
