E lamentable estado di edificio di ex-DOW na Playa

ORANJESTAD (AAN) – Desde tempo cu un edificio bunita y amplio a wordo construi pa Departamento di Obranan Publico, na Sabana Blanco 68, e antiguo edificio na Oranjestad a deteriora mas y mas.

   Logicamente cu e construccion di un edificio nobo

tabata necesario, pasobra “DOW bieu” ya caba tabata tin problema di “edad” refleha den su infrastructura y no tabata sigur mas pa trahadornan ni usuarionan.

No obstante, ora cu e edificio aki a cera su portanan hopi biaha a scucha cual gobierno cu ta na mando, cu lo restaura e propiedad aki y hasta a “rumornan” tabata circula cu tin hende interesa pa cumpre, of  incluso cu lo renobe pa wordo ocupa pa Cuerpo Policial, mirando cu e ta grandi y tin un bon parkeo.

Pero e realidad ta cu añanan a pasa (mas of menos for di 2003) y e lugar ta casi pa cay den otro, na moda di bisa. Pasa cana banda di e edificio tin un holo insoportable, e murayanan ta na werki, yena cu sushi paloma di ariba te abao, den e airconan bieu por mira neishi, den e entrada principal ni papia mes di e sushedad y e cantidad di paloma cu ta biba eynan.

Tin turistanan cu ta saca potret y ta puntra hende local di con no a basha e edificio ey afo. Nan tin añanan ta bin Aruba y no a mira un cambio pa loke ta e propiedad aki, situa na Paardenbaai. Personanan cu ta cana anochi for di Smith Boulevard te e parada di Arubus, ta comenta cu nan ta mira cantidad di djaca ta keiro riba acera, y cu ta sali for di e edificio aki.

Hasta lo ta bon si Departamento di Salud Publico por tira un bista, pasobra un edificio den e condicionnan aki por ta un fuente di contaminacion, por ehemplo di pieu (mirando e poblacion di paloma cu ta habita e lugar) y por atenta contra salud di hende. E ta den un bon punto di e ciudad sin duda; ta un lastima cu gobiernonan no ta haci nada y ta lague sigui bay atras, incluso un persona a puntra si e no por wordo declara monumento nacional pa asina Fondo di Monumento drech’e y haci di dje un joya di edificio manera ta e caso cu varios otro propiedad cu tabata den pesimo condicion. DOW bieu, manera ainda tin hende ta yame, na e momentonan aki ta un berguenza nacional, no obstante cu e ta warda hopi historia; cu eyden a nace hopi proyecto di desaroyo pa Aruba, y cu a wordo dirigi pa profesionalnan grandi y personal servicial. Tur esaki ta balornan agrega cu no mester lubida y tampoco sigui neglisha.