E kreeft ta yuda mantene e rifnan saludabel y bida marino den balans

Directie Natuur en Milieu:

• 
•  

ORANJESTAD (AAN): Na Papiamento nos ta yama e sorto marino aki, kreet, na Ingles ta yam’e Caribbean Spiny Lobster y su nomber cientifico ta Panilirus argus. E ta un especie di kreeft cu tenglanan largo cu tin hopi punta cu ta hinca, nan ta biba den rif di coral y areanan di matanan di mangel.

            E kreeft su curpa ta largo cilindrico cu dos cacho cu ta punta dilanti na e parti riba di su wowonan. Nan color ta varia entre berde olijfi of maron pero tambe tin un tono color cora kima. Nan tin manera un set di antena cu ta mas largo cu nan curpa y ta cubri cu puntapunta. E parti bou di su curpa si ta liso.

            E kreeft por bira 60 cm largo, pero generalmente ta haya nan rond di 20 cm. E especie aki ta cuminsa nan bida como larva microscopico cu ta zweef den lama. E embranan ta carga e webonan parti pafo di nan curpa pa 4 siman.

            Despues di un aña, e larvanan ta bay biba den e yerbanan di lama of na reis di matanan di mangel. Kreeft ta muda varios biaha y ta bay biba den rifnan di coral of skernan di baranca. Mientras nan ta crece nan ta muda di e casca bieu pa busca buraconan mas grandi pa acomoda nan curpa. E ora ey ta e momento cu nan ta mas vulnerabel. Nan ta sconde te ora nan curpa bira duru atrobe.

            E kreeft ta come molusconan, bichinan, material organico den lama y resto di bestianan morto den fondo di lama. Ta calcula cu e kreeft por biba 15 aña of mas. E habitat di e kreeft ta den profundidad di lama te cu 100 m, dependiendo di e temperatura di awa.

            E menasa di mas grandi ta consumo humano. E ta considera como un producto comercial di balor halto. Nan ta importante pa e ecosistema marino, e kreeft ta yuda mantene e rifnan saludabel y tene e bida marino den balans door di controla poblacion di otro especie.