Fiscal di OM Zamira Paesch a splica:
ORANJESTAD (AAN) Desde aña 2023, e sistema di boet na Aruba a cambia. E Fiscal di Ministerio Publico, señora Zamira Paesch, a splica esaki den entrevista cu DIARIO.
El a bisa cu OM a introduci un sistema hopi mas eficiente. “Mi ta corda cu antes polis ta para bo y bisa bo cu el a constata cu bo a comete un infraccion den trafico, y cu e boet ta yega bo cas.
T’asina cu antes polis mester a bay Warda di Polis, skirbi y print e boet aki, mester a firm’e y despues trece na Ministerio Publico, unda cu OM na su turno lo a saca un papel cu lo a yega bo cas, bisando cu bo tin un boet habri cu bo tin cu bin paga” e dama Fiscal a bisa.
El a sigui splica cu aworaki nan a introduci un asina yama: “Oproepings procesverbaal (OPV), cu ta e documento cu polis ta sali cu ne riba caya y parti e boetnan cu ne.
“E documento aki nos por wak e como uno ‘three in one’, pasobra e ta e process verbaal di polis, y riba esaki e Polis ta pone kico ta e infraccion cu e ta constata. Dus, cu cual ley di trafico e persona aki no a cumpli cu ne. E ta skirbi tambe kico ta e declaracion di e persona; di con e no a cumpli cu e ley aki. Por ehemplo, di con bo tin bo safety belt bisti, of di con bo tin bo telefon den bo man”, Fiscal Paesch a duna di conoce.
Polis ta firma e documento aki. Polis ta haya un copia, Huez y Ministerio Publico tambe ta haya un copia di esaki. E ta keda un documento den tres diferente color. E documento aki ta locual ta fungi como prueba, na momento cu e caso yega Corte. Su di dos funcion ta cu di biaha, na momento cu polis duna bo e boet, ta duna bo un fecha y un horario cu bo tin cu presenta na Corte.
“E decir, si awe bo haya un boet, polis ta bisa bo cu entre seis pa ocho siman riba un fecha pa bo presenta na Corte, mayoria biaha ta 8:30’or di mainta. Pues, esey caba ta e oproeping (convocatoria) den un situacion cu bo tin cu presenta na Corte”, Fiscal Zamira Paesch a señala.
El a sigui splica cu e di tres funcion di e documento aki ta cu di biaha e persona ta haya sa kico ta e suma di boet cu e tin cu paga. Por ehemplo, si e ta manehando sin rijbewijs, nan ta marca e huki ey cu nan a constata cu e ta manehando sin rijbewijs, y e transactie bedrag, esun cu tin cu paga prome cu bay Corte, ta 550 florin.
