ORANJESTAD (AAN): DIARIO a combersa cu Dr. Joost Samuels, Chief Medical Officer di AZV riba e desaroyonan nobo cu ta tumando lugar ora cu ImSan a bira oficialmente
un hospital.
Dr. Samuels a expresa cu pa esaki por a tuma lugar tabata tin un forsa grandi pa por logra esey, pero aworaki ImSan aworaki ta un hospital y nan por laga e pashent keda eynan un par di anochi despues di un operacion na e afdeling di estadia corto.
E afdeling aki a wordo traha pa yuda Hospital y ainda esey ta bezig pa wak cual pashent por bay eynan, si e specialista por bay ImSan of no, etc. E ta un tiki complica ainda, a remarca.
Den perspectiva, esaki ta algo bon pa Hospital Dr. Horacio Oduber pa tin mas lugar pa otro pashentnan, a remarca. E intension tambe ta pa trece un alivio pa Hospital.
Joost Samuel a indica cu e plan di ImSan no ta un plan di awo. Tabata tin un Master Plan di hopi aña caba. E fondonan tabata tey. Pero pa por a yega eynan mester a inverti prome pa por a spaar.
Aworaki, a bisa, e no ta wak 'besparing' pasobra esey ta costa placa y esaki tabata un aña dificil, principalmente cu e situacion di Covid-19.
E apertura di e afdeling aki di estadia corto sigur ta un alivio pa Hospital mes si mira cu si den caso cu mester amplia e cantidad di camanan pa casonan urgente, ImSan lo por tuma e pashentnan over, lagando mas cama disponibel na HOH pa e pashentnan di Covid-19 cu mester wordo interna.
