Camara di Comercio y Universidad di Aruba ta bay tene debate electoral riba 3 y 17 di Juni

ORANJESTAD (AAN): Diahuebs mainta durante un conferencia di prensa, presidente di Camara di Comercio (KvK) Omar Tromp a anuncia cu KvK hunto cu Universidad di

Aruba ta bay organiza dos debate electoral.

Den e debatenan aki e lidernan di e diferente partidonan politico ta di Aruba ta wordo invita pa debati riba varios topico relevante pa e maneho gubernamental di Aruba, pa e proximo gobernacion y añanan benidero.

Tromp a splica cu e meta ta pa a base di un plataforma obhetivo brinda pueblo di Aruba e oportunidad pa por sigui di cerca e debatenan unda topiconan critico ta wordo debati.

Mediante e debate e lidernan politico cu ta participa na eleccion 2021 por trece nan propuestanan y solucionnan encuanto e diferente retonan y oportunidadnan cu tin pa Aruba.

E fecha di e debatenan lo ta 3 di Juni 2021 y 17 di juni 2021.

Lo tene dos debate pa asina brinda e oportunidad pa debati riba mas topico y asina crea e oportunidad pa e participantenan di e debate elabora riba tur e topiconan. E debatenan lo ser transmiti en bibo via Tele-Aruba y via “live-stream” tambe.

Presidente di KvK a indica cu Yolanda Richardson ta bay ta moderador di e debate, como cu na Universidad di Aruba e ta duna les den debate y sa hopi di e materia.

E topiconan ta basa riba asuntonan importante pa pueblo di Aruba en general cu merece e debido atencion.

Entre otro ta topiconan cu ta regarda economia, finanzas publico, labor, salubridad, turismo, asuntonan social, enseñanza y justicia.

E televidentenan y siguidornan via “live-stream” por dirigi pregunta digital, via SMS of telefonicamente na un panel independiente, di cual e moderador lo haya e preguntanan adicional lo wordo haci na e politiconan via internet. Mas informacion encuanto e organizacion di e debate, horario y detayenan relevante lo wordo suministra den transcurso di e proximo simannan.