ORANJESTAD (AAN): Manera ta conoci, aña pasa, relacciona cu e condicionnan di Hulanda pa Aruba por a sigui haya fondonan, mester a corta den gastonan di AZV. AZV
mester a corta 5 miyon pa luna den gasto.
Den entrevista cu DIARIO a puntra Solange Tchong, Relacionista Publico di AZV con nan ta mira e situacion pa loke ta e resto di 2021 y futuro.
El a bisa cu pa 2021 manera ta premira ta cu ainda AZV ta haya na e instruccion di Gobierno di Aruba como di Hulanda pa baha den gastonan.
Esaki a causa tambe cu actualmente AZV ta den un 'impasse' cu por ehempel, e Asociacion di Docternan di Cas, cu a indica cu nan lo bay traha un ora menos pa dia, a remarca.
Pa cu esey, AZV a dicidi cu no tin otro opcion y cu mester a bay un 'kortgeding' (caso sumario). Nan ta pendiente di esey pasobra AZV ta haya cu den e situacion aki henter Aruba a entrega. Gran mayoria di e trahadornan a entrega 12,6% di nan entrada y den sector priva ta tende di companianan cu mester a paga 80% di salario so na nan trahadornan, a bisa y e trahadornan a entrega 20%.
Esaki ta indica cu e situacion ta uno critico. Aruba ta mara na e finansas di Hulanda y no por sin e finansas ey. "Pues AZV tin cu cumpli cu e instruccion", Tchong a enfatisa y esaki ta rekeri tambe cu mester corta riba e entradanan of e ganashi di e dunadornan di cuido.
Esaki te cu aworaki no a cay den bon tera den e sentido cu ora cu AZV a indica cu pa aña 2021 tambe lo mester sigui cu e instruccion unda cu pa e docternan ta aplica 2.2% den e prome tres lunanan di 2021 y tog a resulta cu esaki tampoco no ta wordo acepta of nan no ta di acuerdo cu esaki, Solange Tchong a splica.
El a agrega cu aworaki AZV ta den proceso pa un 'kortgeding'.
Esaki mas claro tin su consecuencianan, y e prome consecuencia ta cu e docternan di cas a informa cu for di 1 di April nan lo a baha nan ora di trabao.
AZV a pidi nan pa toch colabora y no hacie. Pero nan a keda riba nan punto, pero ya esey caba ta un consecuencia pa e aseguradonan ya cu nan tin un ora menos di servicio y esaki kiermen cu por ta nan ta bay haya un tempo di spera mas largo ora di yama pa haya e consultorio of un tempo di spera mas largo ora cu kier e cita mes cu e docter di cas, a expresa.
"Esey nos ta lamenta como AZV", e relacionista publico di AZV a manifesta. "Nos no kier e situacion ey, pero e no ta otro cu nos ta conciente di un crisis y nos ta wak akinan den e situacion, Aruba en general".
El a agrega cu den 2021 lo mester keda sigui e instruccion di Gobierno y esaki lo tin consecuencianan, pero ta bay wak si por stop esaki. Pesey mes ta bay Corte cu e docternan di cas pa asina wak si hues por dicta un sentencia den e caso aki.
