Suzette Dumfries ta comparti dos logro:
ORANJESTAD (AAN)-- Señora Suzette Dumfries, “Nation Builder” cu experiencia internacional a sigui splica, den entrevista cu DIARIO, tocante su Plan Dumfries 2030 pa desaroyo di San Nicolas.
El a expresa cu San Nicolas ta un distrito cu tin interes nacional, y su meta ta, pa den e siguiente forum e dianan 19-21 y 22 venidero, trece tur e partidonan necesario hunto y e no por yena Teresita Center den un dia so.
“E cantidad di hendenan no ta pas den Teresita Center den un dia. E cantidad di hende ta masha hopi mes. Manera biaha pasa ora nos a haci nos forum, nos a ricibi 450 persona, y Teresita Center ta tuma cien hende”, Suzette Dumfries a comenta y a indica cu e biaha aki el a pone mas enfoke riba esey, p’esey e forum ta bay ta tres dia, di 6 or di atardi pa 9’or di anochi.
El a remarca cu hendenan di San Nicolas ta loke realmente e ta enfoca riba dje, aworaki. Suzette a bisa cu algo sumamente interesante ta, y e kier comparti cu pueblo, cu entre e forum cu el a presenta luna pasa, y e forum cu e ta bay presenta e luna aki, dos cos hopi importante a pasa. Uno, durante e prome forum na Augustus, el a haya un commitment di abogado Gomez, cu a bise hopi duidelijk, cu si e permiti’e, e lo financia e stablecimento di henter e structura di cual e ta papiando.
“Mi di cu ne, ok, great. Mi no a spera cu asina lihe el a actua riba dje. Y awe caba, prome cu e di dos forum mi por anuncia cu e structura, e instituto cu mester tey pa ehecuta e trabao pa desaroya San Nicolas, a wordo estableci. Tur transaccionnan cu mester tuma lugar, a tuma lugar y nos tin esey”, señora Dumfries a duna di conoce.
Di dos aspecto ta cu ya caba a tuma lugar, ta cu inversionistanan mes a acerca su persona, y bise cu nan ta support e plan cu e tin, y nan kier sa con nan por participa, y cu nan kier participa! Esaki ta mustra e seriedad con e plan pa desaroya San Nicolas, ta wordo tuma.
