Acudi na un mainta di informacion
ORANJESTAD (AAN): Otro siman Diasabra dia 26 di September 2026, e Fundacion E Fortaleza y Sosten pa Famia, ta organiza un mainta informativo y registro pa tur dama cu ta pasando den dificultad di uzo di droga of alcohol, of cu pa un of otro motibo ta den un trauma. Por registra for di 9:00 am te cu 12:00 pm na Club Santa Teresita na San Nicolas.
Durante e mainta aki bo por haya informacion, orientacion y sosten den un ambiente, sigur respetuoso, y confidencial.
For di awe nan kier invita cualkier dama cu tin dificultad cu uzo di droga, alcohol, of ta den un trauma pa e por skirbi nan libremente via email: This email address is being protected from spambots. You need JavaScript enabled to view it. y pasa Diasabra dia 26 di September, pa por ricibi mas informacion. Tambe bo por haci uzo di WhatsApp 740-3237 of na 661-9150 pa asina nan por tin contacto cu bo persona, sperando bo bishita, please skirbi nan.
Tur esaki ta locual nos ta preparando, pasobra como Fundacion ta moviendo seriamente riba construccion di un Rehab y Trauma Center pa Damas, y nan sa cu no ta tur hende mester ta interna den un lugar, pero ora nan tin e contacto, por yega na sa cuanto damas di berdad tin mester di ayudo.
Pesey nan ta invita tur dama, cu por tin dificultad cu uzo di droga of alcohol of den trauma cu ta biba den e tur e barionan den y rond di San Nicolas, cuminsando cu Esso Heights, Lago Heights, Village, Mabon, Cura Cabay, De Vuyst, Colony, Rooi Master, Zeewijk, Juwana Morto, Weg Fontein, Sero Preto, Sero Blanco, Brazil, etc., please acepta esaki como un invitacion personal, pasobra nan tin e boluntad pa yuda bo, pero nan mester sa con pa yega na bo persona.
Pesey Diasabra dia 26 bo por bay dal un coffie of thee cerca nan y asina nan por duna bo informacion di tur loke nan ta haciendo, y con nan deseo ta pa yuda bo persona.
E ta un mainta pa damas, cu ta sinti riba nan curason cu nan mester di un ayudo pa sali for di e dificultad di uza Droga of Alcohol, pero tambe pa esnan cu pa un of otro situacion ta traumatisa.
Nan kier yuda bo, pasobra nan sa, e peliger, cu bo cas, bo famia, bo trabao, bo matrimonio, y bo yiunan ta core, si bo keda den mesun situacion.
E Fundacion tin hende cu ta spera brasa habri cu un mente positivo, cu ta comprende e situacion, duna apoyo, y mustra cu tin speranza, y pa cada ken sa cu nan ta importante.
Asina cu nos ta cla cu San Nicolas nos lo sigui pa otro distrito te na e momento cu nos por yega na tur esnan cu tin mester di ayudo.
