'Airlift Commissie' a haci un presentacion di proyeccionnan hopi positivo principalmente pa 2020

ORANJESTAD (AAN) – Minister di Salubridad Publico y Turismo, señor Dangui Oduber, a hiba palabra den conferencia di prensa di gobierno, Dialuna, unda el a duna di conoce cu Diahuebs, siman pasa, el a reuni cu e 'Airlift Commissie',

di cual a haya un presentacion cu proyeccionnan masha interesante y positivo, vooral pa 2022.

Airlift Commissie ta e Comision cu ta consisti di Ministerio di Turismo, Triple A, ATA y AHATA. E mandatario a splica cu un di e tareanan principal cu e comision aki tin, ta explora e posibilidadnan di ruta y destinacionnan nobo pa nos pais, teniendo cuenta kico e pandemia a haci cu nos.

“ Durante e presentacion extenso aki, nos a haya un update di kico ta e capacidad di asiento pa e siguiente invierno e aña aki y tambe di 2022. Naturalmente, e proyeccionnan di e cantidad di asientonan cu tin disponible pa aña 2022.

Mi tin cu bisa cu Aruba ta conoci como un di e paisnan cu tin miho conectividad den henter Caribe. Na e momentonan aki, 25 aerolinea ta bulando e destinacion di Aruba, for di 28 destinacion, di cual esaki ta conduci na 39 servicio, lo cual ta algo hopi excepcional, di tin tanto aerolinea, tanto destinacion y tanto servicio ta bula nos pais, aworaki”, e dignatario a subraya.

Riba mapa adhunto na e articulo aki por mira e destinacionnan y tur e servicionan cu ta wordo brinda na Aeropuerto Reina Beatrix, y nos producto Aruba, y di e forma aki gobierno ta sigui explora e posibilidadnan pa wak con por sigui amplia ruta, destinacion y servicionan nobo. E mandatario a reitera cu tambe tabata hopi interesante pa observa, e proyeccionnan cu a wordo presenta pa e siguiente invierno y pa aña 2022.

“Nos tin cu bisa cu tur e proyeccionnan ta indica cu Aruba lo bay surpasa e aña 2019, pa loke ta trata capacidad di asiento cu e aerolineanan ta pone disponible pa Aruba.

Aña 2022 ta proyecta riba un cifra di 1.718.176 asiento. Esaki ta hopi mas cu loke tabata tin na 2019, y esun di mas halto den historia di Pais Aruba, cu ta pa prome biaha nos ta haci e proyeccionnan di e cantidad di asiento cu tin disponible, asina halto”, Minister Oduber a señala, y a haci referencia na e grafico cu ta mustra con desde 2004 e cantidad di asiento a keda subi gradualmente, y pa 2022 ta proyecta 1.718.000 asiento, locual sigur ta hopi prometedor y sumamente positivo pa nos turismo, y cu ta demostra e confianza cu e aerolineanan tin den nos producto, pasobra e intencion tambe ta pa nan yena e asientonan aki, pa asina percura pa 2022 ta un aña sumamente positivo pa nos turismo.