E gran Manuel da Silva tambe a fayece Diasabra atardi

Dos gran sostenedor di deporte na Aruba a fayece mesun siman

ORANJESTAD (AAN): E no ta djis conoci pa su forma alegre di atende clientenan na Manuelito’s Sports Bar, y tambe pa ta esun cu a bin cu e Hebbe Hebbe Festival durante temporada di Carnaval.  E ta e persona kende a sa di pusha diferente disciplina di deporte den tur skina, dunando un estimulo fuerte pa mas hende a stima y tambe practica sport na Aruba.

   Riba e potret aki, pa cortesia di famianan, por mira Manuel da Silva kende a fayece Diasabra, sinta riba cama den Hospital di Hubert Tiel, kende a fayece Diabierna.  Dos gran sostenedor di deporte na Aruba!

   Su nomber oficial ta Manuel Andrade da Silva Vargem, naci na Funchal (Madeira) dia 29 di Juli 1961.  E mes ta un deportista, y alavez ta uza su voz pa presenta programa na radio di Power FM , y tambe show na TV, incluyendo e show semanal ‘Racha di Boxeo’, y tambe ‘Sport 30’ di tur Diadomingo.  Den pasado e tabata presenta un show tambe cu ta promove tur actividad cultural, musical, y deporte di Portugal.

   Na comienzo di decada di 1990, e tabata e unico cu a logra pa Manuelito’s a ricibi señalnan di Boxeo di WBC y WBA y e tempo ey no tabatin espacio pa staciona auto.  Ora cu el a bin cu e idea di Hebbe Hebbe, el a ricibi respaldo mesora di mundo comercial, y e evento ey a bira un hit instantaneo riba tereno di Post Aruba NV.

   Y mescos cu defunto Hubert Tiel, e tambe tabata promove Motorsports cada momento.

   Manuel a fayece Diasabra atardi despues di un bataya cortico contra malesa.  Na su gran famia, conocirnan, amigonan, y clientenan, tanto famia Mansur y DIARIO ta manda su mas profundo palabra di condolencia.