Declaracion haci cu presencia di Premier Hulandes saliente den Colony
- A pidi Hulanda yuda cu experticio tecnico
ORANJESTAD (AAN): Den fin di siman cu e refineria di San Nicolas den background, tanto Prome Ministro Mike Eman di Aruba, y Ministro President Dick Schoof di Hulanda, a anuncia un decision historico pa asina cera pa semper e epoca di rafina petroleo definitivamente.
Gobierno di Aruba lo bay desmantela completamente e compleho grandi di refineria cu a cuminza cu Lago Oil & Transport Co. na San Nicolas, y lo bay reasigna e tereno grandi aki pa un desaroyo sostenibel y inclusivo.
“Casi un siglo largo, e refineria tabata e curazon cu a bati pa e epoca industrial di Aruba,” segun Prome Ministro Eman a bisa. “Generacionnan di Arubiano a construi nan bida rond di e refineria. Pero futuro ta exigi balentia. Awe nos ta cera e capitulo ey no djis cu recuerdonan di e contribucion di e refineria, sino riba tur cos cu conviccion, pa habri un capitulo nobo di inovacion, sostenibilidad y e bien comun.”
E refineria tambe a hunga un rol crucial den historia mundial. Durante di Dos Guera Mundial, e refineria di Lago di Aruba tabata un di e principal suministrado di combustibel pa aliadonan, y a contribui asina di forma significante na liberacion di Europa y Hulanda. E importancia historico aki ta haci e momento di transformacion mas special.
Gobierno di Aruba a haci un peticion formal na Gobierno di Den Haag pa asina duna sosten tecnico pa e desmantelamento y descontaminacion sigur di e tereno, y tambe pa e preparacion di subastanan internacional pa cu e remodelamento di e zona.
Prome Ministro Schoof, kende a yega Aruba directamente desde conferencia di COP30 na Brasil, a elogia e decision como un paso balente y visionario cu ta transforma e pasado den futuro.
“Aruba ta demostrando su liderato di transforma algo cu un tempo tabata suministra energia na mundo, awor pa un fuente di recuperacion,” ta loke Schoof a bisa.
Hulanda ta evaluando e peticion di Aruba pa sosten tecnico, y lo bay contribui tambe cu 50 miyon Euro den un fondo special pa transicion di energia destina pa fortalece e red electrico y infrastructura di energia sostenibel.
E remodelacion di e tereno di Refineria di Aruba (RdA) ta ofrece e perspectiva di transforma San Nicolas den un centro di energia limpi, inovacion maritimo, industrianan circular, vivienda, cultura y infrastructura berde, completamente alinea cu e vision di bien comun y e prosperidad sostenibel.
Pa acompaña cu exito e trayecto di hopi aña, Gobierno di Aruba (cu sosten di Hulanda) kier establece un structura solido pa e maneho, coordinacion, y transparencia di henter e proceso di desmantelamento y re-desaroyo. E structura aki lo bay garantiza cu e proyecto ta cumpli cu tur e standardnan internacional di mas halto pa seguridad, proteccion di medio ambiente, y calidad institucional.
E decision, cu a wordo ratifica door di Parlamento di Aruba via e historico Mocion De Meza, ta mustra di ta mas cu un cambio di rumbo economico: E ta un punto di cambio moral y ecologico.
Aki Mike Eman a bisa: “Cu respet pa pasado, pero cu e bista poni riba futuro, nos ta cera e capitulo aki y ta habri uno nobo, den cual e tereno di refineria lo transforma den un fuente di prosperidad nobo.”
Cu e paso aki, Aruba ta mustra na mundo cu e berdadero progreso no ta sinta riba keda wanta pasado bibo, sino di e balor di re-diseña futuro: Di e extraccion pa regeneracion, di e dependencia pa resiliencia.
Pues apenas algun dia despues di COP30, tanto Premiernan Eman y Schoof hunto ta tuma pasonan concreto pa pone den practica e acuerdonan climatico mundial.
