E forza di bondad

Homenahe na Edwin Kock

Skirbi pa Gustavo Corrales Romero 

Den bida di hende, morto kisas ta e unico siguridad. Semper e ta cu nos, tog ta dificil pa custuma cu ne. Y ki dolor e ta haci ora e yega sin aviso! Cuanto ta duel nos ora inesperadamente e ta hiba un homber bon! 

Mi amigo a bay. Morto a tum’e, silenciando abruptamente su harimento habri, su musica sincero, su bondad sin limite. 

Edwin tabata un bon homber cu tabata stima musica y tabata biba p’e. Cu pasenshi proverbial, su impulso constante y incansabel semper a logra loke el a pone su mes pa haci: y semper e tabata na beneficio di otronan! El a yuda, semper a yuda. E no tabata duda pa haci sacrificio personal ora tabata trata di yuda otro hende. Y tabata conmovedor pa mira e orguyo den su wowonan ora e por a presenciá e mehoracion, e triunfo di un otro. Su apatia pa cu su propio reconocimiento publico a pone cu e tabata parse chikito, inconsecuente den bista di esnan cu no tabata conoc’e, pero esnan di nos cu a beneficia di su bondad tabata conoc’e como grandi, ehemplar y insuperabel den su humildad.

Nos a topa na Cuba na fin di añanan 90, ora el a bai studia na e Instituto Superior di Arte na Havana. Semper mi a keda imprecioná dor di su curason noble y su apetito pa conocimiento. Siendo mas bieuw cu nos, e tabata hopi receptivo pa ideanan nobo, dunando atenshon cu curiosidad voraz. E necesidad ei pa amplia su mente a compañ’é durante henter su bida.

Tabata facil p’e pa gana e cariño di hopi studiante. Sera amistad tabata simpel pasobra Edwin, mirando e dificultadnan cu nos tabata biba aden, semper a yuda mas tantu hende cu e por, dunando paña, cuminda... speranza. Con bo no por stima un hende cu, aunke capaz, no ta imponé su mes; un hende cu ta keda ketu en bes di bisa algo cu por haci otro doló! Un hende cu ta nenga su mes pa por duna!

…Edwin tabata un forza transformativo y benevolente…

Pa loke ta trata ami, Edwin a haci lo imposibel pa duna mi e oportunidad di duna un recital di piano na Aruba, y cu e gesto ei, el a cambia mi bida pa semper… y e no a stop eynan.

Ora un hende asina bai laga nos, mundo ta sintié. Asina tanto Bon cu ta wordo paga diripiente ta laga un sombra, un bashí friu cu solamente su memoria bibo por suaviza…

Mi amigo: bo amistad tabata un privilegio y un inspiracion, bon bondad un ehempel, y mientras cu mi ta hala rosea lo bo keda vibra den mi mente. Lo mi mantene bo bibo cu admiracion y gratitud.

Awo, cu bo musica, lanta e angelnan.