ORANJESTAD (AAN):Wings of Hope (WoH) di Aruba Airport Authority N.V. (AAA) orguyosamente a partner cu Korrektie Instituut Aruba (KIA) pa e proyecto di WoH tocante reintegracion social.
Na aña 2025, Wings of Hope di AAA a inicia su colaboracion cu KIA pa medio di un proyecto di reintegracion den comunidad pa su clientenan. E team di maneho di KIA y e team di WoH tabatin diferente reunion pa identifica y discuti e necesidadnan y e limitacionnan actual na e facilidad di KIA.
Durante e reunionnan aki, e areanan di enfoke a inclui renobacion di e facilidadnan incluyendo areanan di personal, siñamento y desaroyo a traves di e compra di Microsoft License, cursonan basico riba varios topico di interes cu ta consisti di teoria como practico, tur pa stimula e siñamento bou di nan clientenan. E colaboracion a inclui tambe un donacion di meubleria pa uzo di nan oficinanan.
Riba diaranson, 4 di maart 2026, Wings of Hope a entrega oficialmente un total di 80 galon di verf y kit di verf incluyendo roller, cuashi y baki pa verf na e team di KIA pa yuda nan provee un facilidad cu un aspecto nobo y fresco. E team di KIA conhuntamente cu nan clientenan lo enfoca riba verf e facilidadnan di nobo como un manera pa curasha tambe e habilidadnan basico di verfmento na un manera practico pa posibel oportunidadnan den futuro den comunidad.
“Nos di Korrektie Instituut Aruba (KIA) kier gradici Wings of Hope sinceramente pa e donacion generoso di e materialnan di verf pa e trabounan paden di e facilidad. Nan aporte ta haci posibel pa mehora nos espacionan y crea un ambiente mas agradabel pa tur esnan cu ta keda y traha aki. Nos ta aprecia inmesamente e participacion y sosten di Wings of Hope”, asina Charles Danker, Hefe di Servicionan di Facilidad, a expresa.
“E esfuersonan conhunto aki ta refleha un compromiso comparti pa stimula siñamento y progreso dentro di nos comunidad local y e compromiso continuo di aeropuerto cu e Metanan di Desaroyo Sostenibel di Nacionnan Uni. Pa medio di e colaboracionnan aki, AAA ta sigui contribui strategicamente, involucra y curasha otro stakeholdernan pa haci mescos y sostene comunidad en general”, asina Angeline Flemming, Director di Health and Sustainability di AAA y lider di Wings of Hope, a expresa.
