E forno di kalki ta den e curazon di Oranjestad como un monumento industrial hopi importante

Clifford Rosa, Presidente di Fundacion Rancho:

*Pero adictonan, sushedad y vandalismo ta e problema! 

ORANJESTAD (AAN) – Den entrevista cu DIARIO,  Clifford Rosa, Presidente di Stichting Rancho, el a menciona cu na April venidero Fundacion Rancho ta cumpli 13 aña di a wordo lanta.

Di e transcurso aki e ta gradici 10 aña cu Aruba Doet y CedeAruba cu e fundacion ta haya un dia cu boluntarionan cu a haci e lugar limpi, y tambe gradiciendo Monumenten Fonds, cu ta doño di e forno y a conserve manera cu e ta.

            Clifford Rosa a señala cu esaki ta un trabao hopi duro y grandi den e añanan  pa asina e forno di kalki wordo mira como un monumento industrial proteha, y como e ta un icono, pa Fundacion Rancho ta trece hende local, no turistanan, pa educa nos hobennan y henter comunidad riba e importancia di un monumento industrial, cu ta diferente na e edificionan cu tin den Oranjestad.  Pero den e curazon di e ciudad aki e forno di kalki ta un monumento industrial hopi importante.

            Pesey e trabao di e fundacion ta pa concientiza continuamente e comunidad riba esaki. El a agrega cu e problematica cu tin den Oranjestad, cu  ta wordo pusha un tiki mas den e forno di kalki, ta e problema di adictonan ambulante. Esaki ta un problema cu ta pidiendo atencion, y señor Rosa por a compronde di Stinchting Monumenten Fonds cu tin ya preocupacion pa e vandalismo. 

            Rosa a señala e problema di vandalismo ta hopi alarmante ki ora cu un monumento ta wordo pinta cu graffiti y algo sosode, ta un situacion fastioso. Pesey Fundacion Rancho ta gradici ainda cu e forno ta den e estado original, cu a wordo conserva.

            El a bisa cu danki cu nan a cera e portanan, y hendenan no por drenta mas, e por wordo mantene. Pero e fundacion su so, no por haci tur e trabaonan aki, y pesey ta pidi atencion y colaboracion di otro instancianan cu ta traha cu adictonan pero tambe Gobierno mes, pasobra tabata tin un City Inspector activo den Oranjestad, cu tabata colabora tremendamente, pero awendia no ta tende mucho mas di City Inspector.

            Serlimar tambe, cu ki ora cu e fundacion a pidi colaboracion nan ta haye pero ultimamente esaki a zwak un poco, den sentido cu nan a planifica con pa atende cu e parti di sushi, cu tambe ta parti di e vandalismo.

            Ademas, Rosa ta menciona DOW cu tambe ta manda su hendenan pa haci limpieza, cual ta e ploegnan cant’i caminda, pero e fundacion ta wak ultimo lunanan hopi discrepancia den con e proceso ey ta canando awo mirando cu Oranjestad ta birando mas sushi y den e area di Rancho tambe ta acumulando hopi mas sushi y e fundacion kier pone atencion na tur esaki, mirando cu e problema di vandalismo riba e monumentonan ta creciendo y mester atende cu ne. E no ta un problema di Fundacion Rancho so, pa mantene esaki. Nan ta meymey di e curazon di comunidad pero nan so no por soluciona e situacion.