Señor Nathan Nicolaas:
ORANJESTAD (AAN): Scol basico St. Franciscus College na Madiki, desde 2018 ta parti di scol saludabel. E meta ta pa no solamente haci alumnonan mas saludabel, sino tambe e mayornan, y maestronan. Esaki ta purba logr’e den diferente manera, segun señor Nathan Nicolaas, docente di movimento y salud di e scol. St. Franciscus College a scoge pa promove e parti social emocional na alumno, docente y mayornan.
Señor Nicolaas a remarca cu e scol ta hopi positivo cu e proyecto aki. Ta uza cualkier herment y ayudo pa yuda e muchanan di scol den e proceso pa biba mas saludabel. E scol ta stimula muchanan bebe hopi awa durante nan ta na scol y na cas. Ta stimula nan pa move mas, haci deporte. Y ta stimula nan pa semper como saludabel, tanto na scol como na cas.
Desde 2018 pa awo, a nota hopi cambio den e muchanan. St. Franciscus College ta un scol ehempel pa otro scolnan cu tambe a cuminsa ehecuta e plannan cu St. Franciscus College haci. “E formula aki cu St. Franciscus College ta uzando ta dunando bon resultado”, señor Nathan Nicolaas a duna di conoce.
