Señora Kinsasha Thielman-van Der Bliek:
ORANJESTAD (AAN): Cunukero, señora Kinsasha Thielman-van Der Bliek den entrevista cu DIARIO a splica cu e no ta di acuerdo cu e sistema cu Gobierno di Aruba ta planea pa introduci pa Aruba. Segun Thielman-van Der Bliek, e sistema aki no ta bon. El a bisa cu apesar cu Gobierno a habri un destaho publico den maneho transparente, na Aruba no tin e experticio den e tipo di greenhouses cu Gobierno kier desaroya.
Bisando esaki, señora Thielman-van Der Bliek a expresa cu e destaho aki ta bay wordo otorga na un compania di afo cu tin e experticio pa e tipo di greenhouses aki mientras cu na Aruba tin expertonan riba otro tipo di greenhouses.
Por lo tanto, señora Thielman-van Der Bliek ta kere cu e destaho publico aki ta na desventaha di Arubianonan y companianan local. Varios compania local a participa na e destaho publico pero ta core masha poco chens pa gana door di e experticio avansa di companianan di afo.
Pa hopi aña expertonan Arubiano a traha nan propio greenhouses y ta cultiva exitosamente. Señora Thielman-van Der Bliek a indica cu Gobierno kier trece ful un otro proyecto nobo cu tecnologia nobo y diferente. E Minister encarga ta considera e raport na unda ta sugeri si e proyecto lo ta factibel y ta genera entrada. Tambe ta considera e diseño tecnico di infrastructura di e proyecto aki. Sinembargo, Thielman-van Der Bliek ta bisa, e minister a lubida di informa e efecto cu e proyecto aki tin riba medio ambiente.
Thielman-van Der Bliek a remarca cu agricultornan no ta mucho contento cu e hecho cu ta bay haci 100mil meter cuadra di tera fertil completamente steril pa e greenhouses nan aki. E tereno grandi aki, Thielman-van Der Bliek a expresa, lo kita posibilidad pa mas agricultor haya pida tereno pa nan planta.
