UNICEF den e Dia Mundial di Mucha awe, 20 di November
ORANJESTAD (AAN)— Dia 20 di November ta un fecha anual cu, practicamente, no ta pasa sin nota y menciona, internacionalmente: E Dia Internacional di e Derechonan di Mucha.
UNICEF: “E infancia y e hubentud ta agentenan poderoso di cambio, nan ta aporta ideanan nobo y perspectivanan cu por yuda construi un mundo miho pa un y tur”.
“Ta mi dia, mi derechonan”
E Dia Mundial di Mucha ta un dia cu UNICEF ta dedica na e accion pa e mucha homber y mucha muher, na escala internacional, y ta conmemora e adopcion di e Convencion di e Derechonan di Mucha, dia 20 di November 1989. Den henter mundo e muchanan ta lanta y ta conta nan bida, speranza y derechonan.
Na henter mundo, ora solo ta sali, e muchanan ta lanta den un mundo cu ta fruto di decisionnan cu nan no a tuma. Pero tambe ta lanta cu derechonan: na wordo proteha, na siña y na expresa nan opinion.
Momento a yega di scucha e mucha y hobennan, di compronde con nan ta biba, y di ki manera nan derechonan ta wordo respeta, ta wordo vulnera, of ta wordo defende dia pa dia.
E Convencion, esun mas universal di tur e tratadonan internacional, ta establece un serie di derechonan pa e muchanan sin distincion di genero, inclui den dje esnan relativo na bida, salud, educacion, recreacion, bida familiar, proteccion enfrente di e violencia y discriminacion, y na nan bos cu mester wordo scucha, nan opinionnan mester wordo tuma na cuenta.
Tur e miembronan di nos sociedad, mayornan, personal docente, personal sanitario, dirigentenan gubernamental, lidernan religioso, figuranan politico, e mundo empresarial, sociedad civil, y medionan di comunicacion, ta desempeña un papel clave den e bienestar di e Infancia.
“Asina aki, e Dia Mundial aki ta ofrece nos un punto di partida pa realiza medidanan inspirado pa defende, promove, y celebra e derechonan di mucha (y hoben) atravez di dialogo y accionnan cu lo construi un mundo miho pa nos muchanan”, mensahe di UNICEF.
DIARIO ta desea tur mucha na mundo y nos muchanan un feliz Dia cu ta conmemora nan derechonan y como Dia Nacional di nos muchanan na Aruba.
