E felis 66 graduado di Colegio Nigel Matthew

ORANJESTAD (AAN): Colegio Nigel Matthew di San Nicolas a organiza “A Starry Night, Blue Moon”, cu ta graduacion di nan alumnonan den ballroom di Aruba Marriott Resort.

E anochi festivo a inicia cu e himno di Aruba interpreta pa Whitney Peña acompaña pa Jayden Richardson riba guitara. Sigui pa discurso di “leiding” di Colegio Nigel Matthew Sra. Jasmine Tromp.

   Minister Endy Croes a duna un discurso y a felicita e graduadonan di aña 2023. Enseñansa ta e motor di un pais y fundeshi di un nacion. Mandatario di Enseñansa a indica cu Gobierno di Aruba tin e tarea pa inverti den enseñansa y crea plataforma pa brinda oportunidad pa tur ciudadano por educa y desaroya nan mes. “Nos ta contento cu e 66 hobennan a haci bon uzo di e oportunidad aki”, Minister Endy Croes a expresa.

   Colegio Nigel Matthew ta conta cu un total di 66 graduado e aña aki. Durante e anochi festivo a reconoce e miho graduado di havo Nzingha Duinkerk. Sigur un momento hopi emocional durante e ceremonia tabata ora cu a recorda e alumno Ashendel Andrea den feliz memoria cu lo a finalisa su estudio e aña aki. Ashendel tabata un alumno ehemplar, dedica, motiva y stima na Colegio Nigel Matthew. Ashendel tabata practica deporte y a representa Colegio Nigel Matthew den diferente competencia escolar.  Ministro a felicita e graduadonan, y gradici Sr. Ivor Curie y Sra. Jasmine Tromp “leiding” di Colegio Nigel Matthew, staf, mentor, docente- y mayornan cu a contribui den e logro di e graduadonan y desea tur graduado hopi exito den e siguiente etapa di nan estudio.