E exitoso compania J&J Corporation a celebra su 30 Aniversario cu introduccion di management nobo

Director Joseph Arends ta retira y su yiunan ta tuma compania over

ORANJESTAD (AAN) – E compania J&J Corporation, a celebra su di 30 aniversario na inicio di aña 2021, y den entrevista cu señor Joseph Arends, director y mitad doño di e compania, el a declara cu pa e fin di aña aki e ta retira pa motibo di salud.

Joseph a bisa cu e tin hopi tempo cu tabata kier retira, y awo a tuma e decision y su yiunan ta tuma e compania over. E tin tres yiu cu tin basta aña ta traha cune, y e momento a yega pa traspasa e empresa y a haci e introduccion di manera oficial, pasobra e tabata asina caba.

Sr. Joseph Arends a expresa cu poco, poco e lo haci trabao for di su cas pa duna conseho, pero no lo traha activamente den background.

El a bisa cu 30 aña ta “long time” y e compania tin un clientela hopi grandi, y hopi tabata presente y hopi contento, y esey ta un satisfaccion pa su persona.

El a comenta cu e negoshi ta bayendo bon, y nan ta bibando di dje, y cu e clientela ta contento ta importante.